भांगरभूंय | प्रतिनिधी
नोंदणी नाशिल्ल्या हॉटेलांचेर दंडाची कारवाय सुरू
पणजी : पर्यटन खात्या कडेन नोंदणी नाशिल्ल्या हॉटेलांचेर कारवाय करपाची प्रक्रिया खात्यान सुरू केल्या. नोंदणे खातीर 800 हॉटेलांक नोटिसो जारी केल्यात. दरेका सप्तकांत 30 हॉटेलांक नोटिसो जारी जातात अशें पर्यटन संचालक निखील देसाय हांणी सांगलें. नोंदणी ना, म्हूण बऱ्याच हॉटेलांकं दंड लेगीत जारी जाला.
गोंयांत जितलीं हॉटेलां आसात तांचे खातीर पर्यटन खात्या कडेन नोंदणी आसा. शुल्क फारीक करून नोंदणीचें नुतनीकरण करप गरजेचें आसा.
पर्यटन खात्या कडेन कायद्या प्रमाण नोंदणी करूंक ना वा नोंदणीचें नुतनीकरण करूंक ना म्हूण आतां मेरेन खात्यान 31 हॉटेलांक दरेकी 1 लाखाचो दंड घाला. हो दंड एका म्हयन्या भितर फारीक करचो पडटलो. दंड एका म्हयन्यांत फारीक केलो ना जाल्यार उदक आनी विजेची जोडणी तोडपा सयत हॉटेल सील करपाची कारवाय जातली. हाचे उपरांत नोटिसो जारी करपाची प्रक्रिया सुरूच आसा.
हॉटेल धनयांनी सील तोडलें जाल्यार कायद्या प्रमाण 10 लाखांचो दंड जातलो. गोंय पर्यटन नोंदणी वेवसाय कायदो 1982 खाला हो दंड घाला. ले आफिया सुटस कळंगूट, ड्युड्रॉप्स ले सिजन्स सिकेरी, कलेक्शन पणजी, स्प्रींग बीज कॉटेजीस कळंगूट, द क्लिफ एज कळंगूट, ब्लू बीच हडफडें, काजा बागा कळंगूट, ग्रेसफूल रूम हणजूणें, ओशीयन सूट लक्झरी दोना पावल, हॉटेल अंश कळंगूट, काजा साल्वादोर कळंगूट, नायट इन कळंगूट, एल्विन्स प्लेस कळंगूट, कृष्णा इन कळंगूट, करिश्मा ग्रँट कळंगूट, जॅकलीन रेसिडेन्सी कळंगूट, काजा अलेक्सो कळंगूट, बागाटेल कळंगूट, हँगओव्हर रिसॉर्ट कांदोळी, एको स्टे सिग्नेचेर कांदोळी, अकाशिया ओशियन मोरजी, मोरजी कोको पाल्म मोरजी, येलो एलीफंट, स्पेसियस ग्रँड रिसॉर्ट कांदोळी, हिप्पी हॉस्टेल हणजूण, पिगी कळंगूट, अॅक्वा मरिना बीच, रेड फॉक्स हॉटेल मोरजी, लिलीवूडस हायलँड बीच कांदोळी ह्या हॉटेलांक दंड घाला. हाचे उपरांत दक्षीण गोंयांतल्या हॉटेलांक नोटिसो दिवप सुरू आसा.
उत्तर गोंयांतल्या हॉटेलांचेर ही कारवाय जाल्या. कांय हॉटेलांची नोंदणी ना. कांय हॉटेलांच्या धनयांनी नोंदणी नुतनीकरणाचें शुल्क भरूंक ना. दंडाची कारवाय जाल्ल्या 31 हॉटेलां मदीं चडशीं हॉटेलां कळंगूट, कांदोळी वाठारांतलीं आसात. कांय हॉटेलां मोरजी, हणजूण वाठारांतलीं आसात.
पर्यटन वेवसायांत शिस्त हाडपा सयत गैरवेव्हार बंद करपा खातीर नेम तशेंच कायद्यांत दुरुस्ती केल्या. कायद्या प्रमाण हॉटेल, रॅस्टोरंण्ट हांची नोंदणी सक्तीची आसा. जांची नोंदणी ना, तांचे आड पर्यटन खात्यान कारवाय सुरू केल्या. तशेंच मेकळे सुवातेर जेवण करपाचे प्रकार लेगीत पर्यटकां कडल्यान चालू आसात. मेकळे सुवातेत जेवण करपाचेर सरकारान बंदी घाल्या. बेकायदाे पर्यटक गायड लेगीत पर्यटकांक सतायतात, अशो कागाळी आसात. बेकायदाे पर्यटक गायडांचेर लेगीत कारवाय जातली अशें पर्यटन मंत्री रोहन खंवटे हांणी जाहीर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
