नील मोहन युट्युबाचे सीईओ

भांगरभूंय | प्रतिनिधी

मुळचे भारतीय नील मोहन हांची युट्युबाचे नवे सीईओ म्हणून नेमणूक जाल्या. हाचे आदीं नील मोहन युट्युबाचे सीपीओ आशिल्ले. तांकां बडटी दिवन ही जापसालदारकी दिल्या. नील मोहन 2008 वर्सा सावन गुगलांत काम करतात. 2013 वर्सा कंपनीन तांकां 544 कोटी रुपया बोनस दिल्लो.
आदली सीईओ सुझान डायन वोजिस्की हांचे सुवातेर आतां ते येतले. सुझान हांणी हालींच आपल्या पदाचो राजिनामो दिला. 54 वर्सां पिरायेच्या वोजिस्की हांणी सांगलें, आपल्या कुटुंबा वांगडा चड वेळ घालोवपाची तांची इत्सा आसा. तशेंच तांचे भलायकेचेर आनी वैयक्तीक जिणेचेर लक्ष केंद्रीत करपाक जाय. देखूनच ती पद सोडटा. 2014 वर्सा तिची युट्युबाची सीईओ म्हणून नेमणूक जाली.
सुझानान युट्युबाचो सीईओ म्हणून नेमणूक जाल्ल्यान नीलाक परबीं भेटयल्यांत. आमी शॉर्ट्स, स्ट्रीमिंग आनी सबस्क्रिप्शनांत जें करतात तें विलक्षण आसा, अशें तिणें सांगलें.
नील हो आमकां फुडारा खातीर योग्य मनीस आसा. 9 वर्सां आदीं जितलो विस्वास युट्युबाचेर दवरिल्लो तितलोच हांव अजूनय दवरतां. युट्युबाचे सगळ्यांत बरे दीस अजून येवपाचे आसात, अशें तिणं सांगलें. नील मोहन हांणी स्टॅनफोर्ड विद्यापिठांतल्यान शिक्षण घेतलां. नीलान आपली करिअराची सुरवात ग्लोरिफायड टेक्निकल सपोर्ट कंपनी सयत सुरू केली आनी थंय तांकां 60,000 डॉलर पगार मेळटालो. ते भायर नील हांणी एक्सेंचरांत वरिश्ठ विश्लेशक म्हणून काम केलां. उपरांत ते डबलक्लिक इंक कंपनीत जॉयन जाले. नील मोहन हांणी हे कंपनींत 3 वर्सां आनी 5 म्हयने ग्लोबल क्लायंट सर्विसेसाचे संचालक म्हणून काम केलें. हाचे भायर सुमार अडेज वर्सां तांणी उपाध्यक्ष बिझनेस ऑपरेशन्साची जापसालदारकी सांबाळ्ळी. हाचे उपरांत नील मायक्रोसॉफ्टांत गेले, 4 म्हयन्यां उपरांत ते परतून डबलक्लिक इंक कंपनीत गेलो.
उपरांत नीलान इंक कंपनींत 3 वर्सां काम केलें. डबलक्लिक इंक उपरांत तांणी 2008 वर्सा गुगलांत वरिश्ठ उपाध्यक्ष, डिस्प्ले आनी व्हिडियो जायरात अधिकारी म्हणून काम करपात सुरवात केली. 2015 वर्सा तांकां युट्युबाचे मुखेल उत्पादन अधिकारी म्हणून बडटी मेळ्ळी. तांचे निवडी खातीर भारतीयांनी खोस परगटायल्या.