नितीश कुमार णववे फावटी मुख्यमंत्री

भांगरभूंय | प्रतिनिधी

परतून ‘एनडीए’ बरोबर थाटलो संवसार; बिहारांत भाजपाचे सम्राट चौधरी, विजय सिन्हा उपमुख्यमंत्री

पाटणा: फाटल्या दोन दिसां सावन सुरू आशिल्ल्या बिहारांतल्या राजकी घडामोडी उपरांत निमाणें काल (आयतारा) नितीश कुमार हांणी णवे फावटी मुख्यमंत्री म्हूण सोपूत घेतलो. बिहारांतल्या राजद सयत, काँग्रेस आनी हेर दाव्या पक्षां कडेन सोडचीट घेवन तांणी भाजपा कडेन हातमेळोवणी केली. ह्या निर्णयाक लागून परतून एकदां ‘एनडीए’ बरोबर संवसार थाटिल्ल्याचें स्पश्ट जालां.

बिहारचे णवे मुख्यमंत्री नितीश कुमार हांचे सयत भाजपाचे सम्राट चौधरी आनी विजय सिन्हा ह्या दोगांनी उपमुख्यमंत्री म्हूण सोपूत घेतलो. जाल्यार नितीश कुमार हांच्या फुडारपणा खालच्या नव्या सरकारांत वट्ट आठ फुडाऱ्यांनी कॅबिनेट मंत्री म्हूण सोपूत घेतलो. काल बिहारांतल्या पाटणा शारांत हो सोपूतविधी सुवाळो जालो. ह्या वेळार भाजपाचे अध्यक्ष जेपी नड्डा हांचे सयत भाजपाचे हेर कार्यकर्ते हाजीर आशिल्ले.

उपमुख्यमंत्रीपदाचो सोपूत घेवचे पयलीं भाजपान विधीमंडळ पक्ष फुडारीपदार सम्राट चौधरी आनी उपफुडारीपदार विजय सिन्हा हांची निवड केल्ली. ह्या दोगां सयत भाजपा कडल्यान डॉ. प्रेम कुमार, जेडीयू कडल्यान विजय कुमार चौधरी, श्रवण कुमार, विजेंद्र यादव, एचएएम कडल्यान संतोष कुमार सुमन आनी अपक्ष सुमीत कुमार सिंह हांणी लेगीत मंत्रीपदाचो सोपूत घेतलो.

मजगतीं, आदल्या दिसा नितीश कुमार हांणी राजभवनांत राज्यपाल राजेंद्र आर्लेकार हांकां पत्र सादर केले उपरांत बिहारच्या मुख्यमंत्रीपदाचो राजिनामो दिलो. राजिनामो सुपूर्द केले उपरांत पत्रकारां कडेन उलयतना कुमार हांणी म्हणलें, तांणी राज्यपालांक बिहारांतली महागठबंधन युती काडपाक सांगलां.

जेडी (यू) फुडाऱ्यान सांगलें की, लालू प्रसाद यादव हांच्या राष्ट्रीय जनता दल (आरजेडी) आनी काँग्रेसी सयत तीन दाव्या पक्षांचो आस्पाव आशिल्ल्या महागठबंधन युतींतली परिस्थिती सारकी नाशिल्ली. हाका लागून राजिनामो दिवचो पडलो. महागठबंधन आघाडेंत कांय गजाली बरोबर नाशिल्ल्यान हांव खूबशा दिसां सावन खंयचेच गजालीचेर उलयनाशिल्लो. म्हाका म्हज्या पक्षाच्या कार्यकर्त्यां सयत सगल्यांचीं मतां आनी सुचोवण्यो मेळटाल्यो. हांवें त्या सगल्यांचें म्हणणें आयकून घेतले आनी मुख्यमंत्रीपदाचो राजिनामो दिलो अशें नितीश कुमार हांणी म्हणलें.

मजगतीं, फाटल्या 23 वर्सांत बिहारांत पांच फावटी विधानसभा वेंचणुको जाल्ल्यो आसल्यो तरी नितीश कुमार हांणी णव फावटी मुख्यमंत्रीपदाचो सोपूत घेतला. नितीश कुमार अशे फुडारी आसात जांणी अटल बिहारी वाजपेयी, लालकृष्ण अडवाणी, नरेंद्र मोदी आनी अमीत शाह हांच्या भाजपा बरोबर काम केलां. नितीश कुमार 2000 वर्सा पयले फावटी मुख्यमंत्री जाल्ले. वाजपेयी सरकारांत तांणी केंद्रांतूय जापसालदारकी सांबाळिल्ली. 2000 वर्सा भाजपाच्या तेंक्यार तांणी बिहारचे मुख्यमंत्री म्हूण सोपूत घेतिल्लो. एनडीए कडेन फक्त 151 आमदार आशिल्ले जाल्यार आरजेडी कडेन 159 आमदारांचें संख्याबळ आशिल्लें. नितीश कुमार हांणी मुख्यमंत्रीपदाचो सोपूत घेतलो पूण सात दिसां भितर तांकां राजिनामो दिवचो पडिल्लो. उपरांत 2005 वर्सा भाजपाच्या तेंक्यार दुसरे फावटी मुख्यमंत्री जाल्ले.

2010 वर्साचे विधानसभा वेंचणुकेंत आरजेडीक मोटो धक्को बसलो. एनडीएक 206 सुवातो मेळ्ळ्यो. जाल्यार आरजेडीक फक्त 22 सुवातांचेर समाधान मानचें पडलें. त्या वेळार जेडीयून 141 उमेदवार वेंचणुकेंत देंवयिल्ले. तातूंतले 115 जिखले. 2010 वर्सा नितीश कुमार परतून मुख्यमंत्री जाले आनी भाजपाचे सुशील कुमार मोदी उपमुख्यमंत्री जाले.

नितीश कुमार हांचो पांचवे फावटी ‘यू टर्न’

नितीश कुमार हे बिहारच्या राजकारणांतले बळिश्ट फुडारी म्हूण वळखतात. 2013 सावन तांचे ‘एनडीए’ ते ‘यूपीए’ ते महागठबंधन अशें चार फावटी ‘यू टर्न’ जालां. पयलीं ते यूपीएत आशिल्ले. उपरांत तांणी एनडीएची कास धरली. उपरांत थंय सावन भायर सरून महागठबंधनांत प्रवेश केलो. आतां लेगीत इंडिया आघाडीचे स्थापणुकेंत तांचो म्हत्वाचो वांटो आशिल्लो. पूण आतां तेच परतून ‘एनडीए’त आयले.

हांव परतून ‘एनडीए’त: नितीश कुमार

हांव पयलीं राष्ट्रीय लोकशाय आघाडींतूच (एनडीए) आशिल्लों. आतां परतून थंयच आयलां. आतां खंयच वचपाचो प्रस्नूच उप्रासना अशा उतरांनी मुख्यमंत्रीपदाचो सोपूत घेतले उपरांत नितीश कुमार हांणी आपली पयली प्रतिक्रिया उक्तायली. आमी बिहाराचे उदरगती खातीर काम करीत रावतले अशेंय तांणी स्पश्ट केलें.

जेडी(यू) पक्ष सोंपतलो: तेजस्वी यादव

बिहारांतले राजकी घडोमोडीचेर उलयतना जेडीयूचे फुडारी आनी आदले उपमुख्यमंत्री तेजस्वी यादव हांणी म्हणलें, 2024 वर्सा जेडी(यू) पक्ष सोंपतलो, हें हांव तुमकां लेखी बरोवन दिवंक शकतां. कारण लोक आमचे बरोबर आसात.