भांगरभूंय | प्रतिनिधी
एक आसलो सुलतान. कला पारखी. कलेचो आदर करपी. ताच्या दरबारांत सदांच कोण ना कोण कलाकार येताले आनी आपली कला सादर करताले. सुलतान तांची कला तोखेतालो आनी तांकां धन दिवन भोवमान करतालो.
एक दीस सुलतानाच्या दरबारांत कांय चिनी आनी ग्रीक मनीस एकाच वेळार भितर सरले.
चिनी मनशांनी सुलतानाक सलाम केलो आनी म्हणलें, ‘म्हाराज, आमी चीन देशांतल्यान आयल्यात. आमी सगळे एका परस एक उत्कृश्ठ कलाकार. आमची बरोबरी कोणूच करूंक शकचे नात.’
ग्रीक मनीस सुलताना मुखार आयले आनी तांणी नमळायेन तांकां सलाम केलो. ‘म्हाराज, आमीय सगळे उत्कृश्ठ कलाकार. आमी कळमेल्ली वस्त घासून पुसून चकचकीत करपी. आनी तातूंतल्यान तांणी केल्ल्या कलाकृतीचो आभास निर्माण करपी आमी.’
सुलतानान तांची परिक्षा घेवपाचें थारायलें. ताणें चिनी आनी ग्रीक लोकांक दोन कुडी दिल्यो. सामक्यो एकमेकां सामकार.
चिनी लोकांनी सुलताना कडेन शेंकड्यांनी रंगांची मागणी केली. सुलतानानय तांकां मागता तितले रंग दिले.
ग्रीक लोकांनी म्हणलें, ‘आमकां रंगाची गरज ना. आमी कात कळम लागल्या ती घासून-पुसून लिप्प करतले.
कांय दीस गेले. दोगांयचें काम सोंपलें. चिनी आपल्या कामाचेर सामके खूश जावन उडयो मारपाक लागले. तांणी बेगोबेग राजाक आपयलें.
‘वा! वा! वा! सुंदर! अतिसुंदर! चिनी मनशांनी रंगयल्ल्या चित्रांक पळोवन सुलतानाचें मन सामकें प्रसन्न जाल्लें.
तांकां भरभरून धन दिवन सुलतान ग्रीक रावताले त्या कुडी सरीं आयलो. ग्रीक मनशांनी सुलतानाक उमेदीन येवकार दिलो. आनी मुखावयले वणटीक लायिल्लो पड्डो अचळय कुशीक काडलो. वा! मुखावयलें दृश्य पळोवन सुलतानाचे दोळे अजापान उक्तेच उरले. वणटी वयल्या त्या चकचकीत कुडक्या भितर मुखा वयल्या चिनी मनशांनी रंगयल्ल्या चित्रांची नितळ निवळ हुबेहूब प्रतिकृती. तांणी हारसो तयार केल्लो. आनी सुलतानाक चिनी लोकांनी केल्ल्या चित्रांचें प्रतिबिंब दाखयलें. तांकां आपले कलेचो मातूय अहंकार नाशिल्लो. जीं काळजां नितळ-निवळ आसतात तातूंतच हारशा वरी लख्ख प्रतिबिंब उदेता.
जलाल अलदीन रुमीच्या काणयेचें स्वैर रुपांतर
नयना आडारकार
9823537563
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
