भांगरभूंय | प्रतिनिधी
दिवचलः नानोडें रस्त्यार कदंब बस आनी आल्टो मोटारीची टक्कर जावन जाल्ल्या भिरांकूळ अपघातांत वयलो वाडो- साळ हांगाच्या महादेव सावळाराम रावत (66) आनी सोनाली दीपक रावत (32) ह्या मांव- सुनेक मरण आयलें. शुभदा नारायण रेडकार (65, बांदा) आनी आशीश अनंत परब (42, साळ) हांकां गंभीर दुखापत जाल्या. तांचेर बांबोळे गोंय वैजकी म्हाविद्यालयांत (गोमॅकॉ) उपचार सुरू आसात.
बिरेस्तारा सकाळी साडे धाच्या सुमाराक नोनोडें रस्त्यार पूजा गेस्ट हावसा लागीं हो अपघात जालो. जीए 03 सी 8447 ही आल्टो मोटार साळ कासारपालच्यान म्हापश्यां वताली. जीए 03 एक्स 0244 हे कदंब बशीन गाडयेक धपको दिलो. गाडयेंत आडकल्ल्या दोगांक दिवचलच्या उजो पालोवपी दळाच्या जवांनांनी भायर काडले. मेळिल्ले म्हायती प्रमाण आल्टो मोटार करासवाड्यार वताली. ह्या अपघाताक लागून साळ गांवांचेर दुख्खाची सया पातळ्ळ्या.
जे सुवातेर हो अपघात जालाे थंय एक धोक्याचें व्हॉल्त आसा. हे सुवातेर अपघात जावपाची भिरांत आशिल्ल्यान थंय पूल बांदपाचो विचार आशिल्लो. पूण साळचे ग्रामसभेंत ताका विरोध केल्लो. तेच सुवातेर अपघात जावन वयलो वाडो- साळ हांगाच्या दोगांक मरण आयलें. दोडामार्ग पुलीस स्टेशनाचे हवालदार कृष्णा नायक हांणी अपघाताचो पंचनामो केलो, दिवचलचे पुलीस अपघाताची चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
