नादोडा माऊली भूतनाथ देवस्थानांत सोमारच्यान मूर्ती प्रतिश्ठापना सुवाळो

भांगरभूंय | प्रतिनिधी

भांगरभूंय प्रतिनिधी
म्हापशेंः नादोडा हांगच्या श्री माऊली भूतनाथ पंचायतन संस्थानांत 31 नव्यो पाशाणी मूर्ती प्रतिश्ठापना सुवाळे सोमार 16 तें शुक्रार 20 मे मजगतीं जातलो. 20 तें 26 मे मेरेन बीड- महाराष्ट्र हांगचे भालचंद्र केजकार हांच्या मार्गदर्शना खाला संगीतमय श्रीमद् भागवत सप्तक ज्ञानयज्ञ कार्यावळ जातली.
नादोड्यांतल्या गांवस कुटुंबाचे माऊली भूतनाथ हे कुलदैवत आसा. मूर्ती प्राणप्रतिश्ठापना सुवाळो वाराणसी हांगचे वेदमूर्ती गणेश्वर द्रवीड शास्त्री हांच्या पौरोहित्या खाला जातलो. सोमार तें शुक्रार मेरेन सकाळीं 7 तें दनपारां 1.30 मेरेन वेगवेगळे धर्मीक विधी आनी म्हाप्रसाद जातलो. 16 मेक सांजे 7.30 वरांचेर तेंडोली हांगच्या वावळेश्वर दशावतार नाट्य मंडळा वतीन वृक्ष विरहीत फळ हो प्रयोग जातलो.
मंगळार 17 मेक सांजे 7.30 वरांचेर कुलदेवी नामस्मरण ह्या विशयाचेर सचिन भाटवडेकार हांचें प्रवचन जातलें. 18 मेक साजें थळाव्या भजनी कलाकारांची कार्यावळ जातली. बिरेस्तार 19 मेक सकाळीं दत्तधाम- नाशिक हांच्या दत्तदास महाराज हांचे हस्तुकीं शिखल कलश स्थापना आनी हेर विधी, सांजें 7.30 वरांचेर  गणेश्वर शास्त्री हांचें आशीर्वचन जातलें.  शुक्रार 20 मेक म्हापूजा, मंत्रपूजा, दनपारां म्हाप्रसाद जावन उत्सवाचो समारोप जातलो.