भांगरभूंय | प्रतिनिधी
संवसारांत मनीस आसतात हरतरेचे. दरएक मनशाचो सबाव वेगवेगळो. आपणाक वळखप सोंपें जावंचें म्हणून ताणें नांवां जल्माक घालीं. पूण ताणें फकत आपणाकच नांवां दवरलीं नात तर सैमांतल्या प्रत्येक वस्तूक, झाडां- पेडांक, फुलां, फळांक तशेंच जनावरांकूय नांवां दवरलीं. पूण, मनशाचें पोट नांवांनूच भरलें ना. ताका नांवा फाटल्यान आडनांवांचीय गरज भासली.
सांगपाचें म्हळ्यार मनशाक एकूच नांव आसता, अशेंय ना. घरचें म्हूण एक टोपण नांव, इश्टांनी दवरिल्लीं नांवां, तशेंच ताच्या सबावाचेरुय आदारुन जायतीं नांवा ताच्या गळ्यांत पडिल्लीं आसतात. हरशीं पळोवंक गेल्यार नांवांत- आडनांवांत कांयच नासता. काळे आडनांव आशिल्ले गोरे पिठ्ठ लोकूय हांवें पळयल्यात तशेंच खोंपीत रावपी गरीब लक्ष्मीय पळयल्या. पूण What’s there in the name? म्हणपी शेक्सपियर मात आपल्या ह्या विधाना सकयल आपलें नांव बरोवंक केन्नाच विसरलो ना. मनशाक दवरपाचीं नांवां उणी पडपाक लागल्यांत म्हूण जांवये मनशांनी आपल्याक फुलांचीं नांवां दवरपाक सुरवात केली. जशें मोगरें, शेंवतें, गुलाब, आबोलें… पूण आमी फुलांक मात चुकून लेगीत करिना, कतरिना असलीं नांवा दवरलीं नात. मनशांनी फुलांची नांवा आपणावपाचीं सोडूच, तांणी जनावरांक आनी झाडांक लेगीत सोडलीं नात. तांणी तांच्या नांवांचीं आडनांवां करुन सोडलीं. जशें वाघ, गायतोंडे, आंबे , माड …
थोड्यांक तर दुसऱ्याच्या नांवा -आडनांवा वेल्यान फकांडां करपाची संवंय आसता. पूण, ते करतनाच फकांडां करप्यांक आपले भितरली सर्जनशीलताय दाखोवपाची बरी संद मेळटा. अशीच संवय आमकांय ल्हानपणांत आशिल्ली. आमी सगळीं भांवडा मे म्हयन्यांत मामागेर रावपाक वतालीं. खेळटना आमी आमच्याच आडनांवाचीं फकांडां मारतालीं. जशे म्हज्या मामेभावाचें आडनांव ‘कामत’- ताका आमी ‘कामत, कडी जाली आमट, हुमण जालें तिखट’ अशें म्हणून चाळयतालीं. म्हज्या एका मावसभावाचें आडनांव बोरकार जाल्यार दुसऱ्या मावसभावाचें आडनांव वागळे. तांकां आमी ‘बोरकार- बोरां विकता रे?’ आनी ‘ढूम दिशे, वागळे पिशे’ म्हणीत ते रडसर तिडायतालीं. आनी म्हजें आडनांव सालेलकार जाल्ल्यान तीं म्हाका ‘सालेलकार – साली काडटा काय’ म्हूण विचारतालीं. म्हजें नांव तानिया जाल्ल्यान म्हजी बापोलभयण म्हाका ‘तानी तुका तान लागल्यार म्हाका सांग’ म्हूण चाळयताली आनी हांवूय ताची फिरकी घेत ‘साची.. तूं वच खांची’ अशें म्हण्टालें.
आज ते दीस फाटी गेले. सगळीं आप- आपल्या कामांत गुल्ल आसात. पूण केन्नाय कोणेंय असलीं फकांडां केल्लीं आयकल्यार म्हाका म्हज्या भुरगेपणाची याद आयले बगर रावना.
तानिया लोटलीकार
9158850477
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
