भांगरभूंय | प्रतिनिधी
जितलें म्हूण आमी ह्या आचरणांच्या पालनांनी मग्न उरतले तितलीं आमकां मानसीक उबारी मेळटली आनी आमच्या सासणीक सबावा कडेन आमी सुमेळ सादतले.
आमकां नव्या नव्या गजालींची इतली ओड कित्याक हें तुमी केन्ना चिंतलां व्हय? भुरगेपणांत आमी नव्या खेळण्यांची उमळशीकेन वाट पळयतात. जस जशे आमी व्हड जातात, तस- तश्यो आमच्यो आवडी बदलतात. जशें की आमकां नवी सायकल, घडयाळ, नवीं उपकरणां, घरां, फोन हीं जाय दिसतात. आमचो सभावधर्म असो : कसल्याय बी नव्या गजाली विशीं आमकां ओडणो आसता.
ही प्रवृत्ती आमचे भीतर खंय सावन आयली? आमी व्हडा उमळशीकेन प्रत्येक नव्या वर्साची, नव्यान कितेंय सुरू करपाची, नवे- नवें निश्चेव करपाची कित्याक वाट पळयतात? खरे म्हणचे आमचे भितर आसलेली नवेंपणाची ओड ही कितें उखलापी वा अपघाती न्हय. ती, जाका आमी पवित्र आत्मो म्हण्टात थंय सावन म्हणल्यार भितरल्या अंतस्करणांतल्यान येता.
आमी जीव म्हणल्यार सासणीक दिव्य आत्मे जावन आसात. जरीकय आमच्यो कुडी म्हाताऱ्यो जातात आसल्यो तरीकय आमचे आत्मे म्हातारे जायनात. ह्या अर्थान आमी पोरणे आसुन लेगीत सदासर्वदा नवे. देखून, विविधताय, नवेंपण आनी परिवर्तन हांचे विशीं खर आंवडो आसप ही आमच्या सासणीक आत्म्याच्या सबावाची सैमीक अभिव्यक्ती.
अशें म्हणटात की “विविधताय ही जिणेंतली खरेली गोडी’आमी नव्या पक्वानांचो, अणभवांचो, थळांचो आनी कर्तुबांचो सुवाद येतात. पूर्ण ह्या भौतीक जगांत सगळेच काळांतरान पोरणें जाता. सुरवेक जरी तें कितलेंय ओडलायणे दिसलें आसलें, तरीकूय काळ ल्हवू ल्हवू तातुंतली मोहकताय नश्ट करता.
देखीक एखादो नवो आयफोन सुरवेकचे कांय दीस आमकां अजापांत दवरता. पूण कालांतरान तें बोल्सांत आनीक एक साधन म्हूण उरता. एक नवीच विकती घेतिल्ली गाडी सुरवातीच्या काळांत आमच्या मनां मदीं उमेद हाडटा. पूण कांय म्हयन्यां उपरांत तें नवेंपण ना जाता. एखादे नवें वर्स लेगीत जें आमका सुरवेकचे काय दीस उत्तेजीत करता तें आमची दिसपट्टी जीण सुरू जातकीच मागीर आपणा कडलें चैतन्य वगडावन बसता.
हें पळयतकूच एक मुळावो प्रस्न उबो रावता तो असो : आमी आमची खुशी कशी म्हूण लांबोवप? आमी आमच्या नव्या वर्साचे निश्चेव कशे म्हूण तडीक व्हरप? ह्या वयल्या प्रस्नांच्यो जापो आमी आमच्या आत्म्याचो सभावगुण आनी ताचें ईश्वरा लागीं आसलेलें नातें समजुन घेतल्यार मेळटात.
आमी पवित्र आत्मे आशिल्ल्या कारणान सभावीकपणान आमी सदांच नूतन, गतिमान आनी नित्य नव्या वशीन वळटात. पूण संवसारांतले कितेंच हो आमचो आंवडो सासणा खातीर भागोवपाक शकनात. कारण ह्या भौतीक जगांतल्यो सगल्योच गजाली खिणयाळ्यो आसतात. पूण जेन्ना आमी समेस्त नविनतायेचें मूळ स्रोत आशिल्ल्या ईश्वरा लागीं नातें जोडटात, तेन्नाच आमी खरेलें आनी सासणीक नवेंपण अणभवतात.
कृष्ण हो चिरकालीन जुवान- सासणीक नवेंपण – सद्दां सोळा वर्सांचो भुरगो कसो. सगळ्यां परस जाण्टो आसुन लेगीत त्याच वगतार सगळ्यां परस भुरगो असो तो! ताच्या बाबतींत सगलेंच नवें ताल्ल.
जेन्ना आमी ह्या अध्यात्मीक नवेंपणाच्या शक्तीथळा कडेन नातें जोडटात तेन्ना नवेंपणा खातीरचो आमचो भितरलो आंवडो सफळ जाता. प्रत्येक दीस नवो जाता. कारण दर दिसा ईश्वरी कृपे कडेन एकरूप जावपाची आमकां संद लाभता. काळ नश्ट करुंक शकना अशी मोहकताय जिवीताक प्राप्त जाता. ही अशी कृपा लाबिल्ल्या मनशाक आपणालें जिवीत गिरेस्त, सुंदर आनी सार्थकी लागलां अशें दिसता. अशा मनशाक देव म्हयन्यांचे म्हयने आनी वर्सांची वर्सां सदांकाळ प्रेरणा दिता. ह्या एकरूपतायेक लागुन तो भायले कसलेच बदल बादनात असले तरेचो नवो आनंद अणभवता.
ह्या नव्या वर्सांत भितर सरतना आमी आमचें हें ईश्वरा वशींतलें नातें अदिक – अदीक घटमूट करपाक वावरुया. ह्या नात्याक पसवण दिवपाक साद्या, पूण बळिश्ट आचरणांचें आमी पालन करुंक जाय. देखीक भगवंताची प्रार्थना करप, ताच्यो लीला आनी शिकवण्यो आयकप, ताची पवित्र नांवां गावप आनी ताची तन- मन सेवा करप. जितलें म्हूण आमी ह्या आचरणांच्या पालनांनी मग्न उरतले तितलीं आमकां मानसीक उबारी मेळटली आनी आमच्या सासणीक सबावा कडेन आमी सुमेळ सादतले.
हें नवें वर्स निखटें कॅलेंडर बदलपा इतलेंच सिमीत उरचें न्हय. तें व्हड जावचें. तें सांसणीक नवेंपणाचे स्रोत आसलेल्या भगवंता कडेन नातें जोडपाची सुसंद जावचें. आमचें खर हावेस, खर आंवडे आन मोग हाची तृप्तताय करपाची तांक ह्या संयोगांत आसा.
(मूळ लेखक: राधानाथ स्वामी)
प्रदीप लवंदे
9923292022
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
