भांगरभूंय | प्रतिनिधी
इसवी सनाचो 885 ते 1000 वर्सांचो काळ- भारताच्या खजुराओ वाठारांत चंडेला राजवट सोबीत अशीं देवळां उबारता. तांचेर कोरातिल्लीं नग्न अवस्थेंतलीं शिल्पकला तरण्या चल्यांक संवसारीक जीण कशी जगची हाचें ज्ञान दिता.
वर्स 1504 – मायकल एंजेलो नांवाचो इटलीचो कलाकार डेवीड नांवाचो पुतळो तयार करता. फ्लोरेंसाच्या प्रजासत्ताकाचो तो प्रतीक जाता. ताची नग्नताय युद्धाक वचपाचे तयारेक दर्शायता अशें मत निर्माण जाता. सुरवेक कांय जाणांक ती नग्नताय सोंसना, पूण मुखार डेवीडाची नग्नताय अज्रंवर जाता.
वर्स 2022 – रणवीर सिंग नांवाचो अभिनेतो नागडे अवस्थेंतले फोटो एका नेमाळ्या खातीर काडटा आनी सोशल मिडियाचेर घालता. ताचेर कांय जाणांच्यो भुंवयो वयर सरतात आनी ताका कपडे दान करप जांव ताचेर न्यायालयीन खटलो चलोवपाच्यो गजाली सुरू जातात. खरें म्हणल्यार भारतीय दंड संहितेच्या 294 अ आनी ब कलमा खाला तसो हक्क नागरिकांक दिला. पूण, ज्या ओबसीनिटी बद्दल आमी उलयतात ती खंय सुरू जाता आनी खंय सोंपता हाचो विचार जाला काय?
मनीस जल्माक नागडोच येता. आमी ‘सुसंस्कृत’ मनशां मागीर ते नग्नतायेक धांपतात. कारणां जायतीं पूण आंगाची रक्षा करप हो एक हेत. पूण मनशाच्या आंतरीक वैयक्तीक जिणेंत मात हें नागडेंपण ताची फाट सोडना. न्हातना, शारिरीक संबंद दवरतना ताका नग्न अवस्थेंत रावचें पडटा.
नग्नताय खरे म्हणल्यार मनशाचें मूळ स्वरूप. कपडे ताची सुसंस्कृताय. पूण, कलेच्या मळार जायते फावट हीच नग्नताय सौंदर्यशास्त्रीय नदरेन पळोवप जाता. ती तशी सगलेच पळयतात अशेंय ना. कांय जाणां खातीर नग्नताय म्हणल्यार फकत भोग-वासनेचें प्रतीक जावन उरता. पूण नग्नतायेन कितल्याशाच जाणांक अन्याया आड झगडपाचें बळगें दिलां.
ताका लागून नग्नताय फकत काम भावनेक संबंदीत आसना तर नग्नतायेन समाजीक बंधनां मोडून काडपाचें बळगें आसता. जाय ती फकत मनशाचे त्वचे पलतडीं आशिल्ल्या तत्वांक जाणून घेवपाची बुद्द.
सगल्यांत म्हत्वाची गजाल म्हणल्यार, हीच नग्नताय जेन्ना प्रौड चित्रपटांनी दाखयतात तेन्ना मात कोणाक आक्षेप आसना. रणवीर सिंगाचे नग्नतायेक विरोध करप्यां मदल्यांनी केन्नाच पळोवंक ना म्हणटात तुमी नग्न फोटो जांव फिल्मां? विचार करपा सारकी गजाल!
एके वटेन अशें दिसूंक लागलां, आज सगल्यांक इतलीं माध्यमां मेळ्ळ्यांत की खंयचेय गजालीक विरोध करप खूब सोंपें जालां. दुसर्याचें नागडेपण मुखार हाडटना केन्ना केन्ना मनीस आपल्या मनाचें धांपिल्लेपण उक्ताडार हाडटा काय असो प्रस्न पडूंक लागला. कारण देशांत अश्यो कितल्योश्योच गजाली चल्ल्यात, जाचो त्रास आमकां जावंक जाय. म्हारगाय, बायलांचेर जावपी अत्याचार, सामुदायीक मतभेदांतल्यान सुरू जावपी वाद आनी झगडीं. पूण आमकां त्या सगल्यां परस नग्नताय चड म्हत्वाची दिसता.
केन्ना केन्ना हे विरोध, ह्यो न्यायालयीन केसी लक्ष वेधपाचे वा लक्ष दुसरे कडेन व्हरपाचे प्रकार काय असोय प्रस्न पडले बगर रावना.
जर विरोध करप्यांक भुरग्यांचेर कितें परिणाम जातलो हाचो भंय दिसता जाल्यार भुरग्यांच्या मनाचेर परिणाम करपाक आनीक कितल्योश्योच गजाली आज समाजांत चलतात. आमच्या टी.वी. चेर येवपी मालिकाच पळयात – सगल्यो आवयो, बापूय भुरग्यां वांगडा बसून त्यो पळयतात. कोण नागीण जावन कोणाचे घट्टाण करता जाल्यार कोण सून मायचे त्रास सोंसत रावता. लैंगीक समानताय जाय म्हणटा त्याच काळांत एक ‘संस्कारी’ बायल कशी आपलीं सपनां मारून घरचीं कामां करता, घोव मारता जाल्यार सुद्धा त्या लग्नांत रावता अशे आनीक जायते कदिम काळांतले विचार दाखोवपी मालिका सर्रास चलतात, पूण ताचेर कोणाक कांयच दिसना, कारण जायतीं जाण तेंच सत्य वा जीण तशीच आसूंक जाय, हो विचार घेवन मुखार वतात आनी तशीच जगतात.
बुरसटिल्ल्या विचारांचे कपडे घाल्ल्यांक ती मनीसपणाक धरून आशिल्ल्या विचारांची नग्नताय दिसना. कारण सुसंस्कृत जावपाचे वाटेर मनशान कितल्याश्याच समाजीक घटकांचें सोशण केलां आनी तें आयज लेगीत सुरू आसा हाची जाण मात आमकां जायच ना. कारण आमी आमच्या अनैसर्गीकतायेच्या कपड्यांनी सुखी आसात.
आमकां सोंशीकताय करपी विचार पिजून वडोवपाचे नात आनी ‘संस्कृती संवर्धक’ म्हणून मिरोवपाचे आसा. पूण मनशाक हे मात समजूंक ना की संस्कृताय संवर्धन म्हणल्यार फकत आदीं सावन चलत आयिल्ल्यो परंपरा तिगोवन दवरप न्हय तर तातूंतल्यो खंयच्यो परंपरा मनीस कुळाच्या आनी सैमाच्या हिताच्यो आनी खंयच्यो आमचे खातीर मारक हे जाणून घेवप. परंपरेंतलें सगलेंच जपिल्ले जाल्यार घडये खंयचीच बायल आयज मेरेन हुंबरो हुपून भायर सरची नासली. खंयचोच दादलो रांदचेकुडींत पावचो नासलो. शिक्षण आयलें, बरे वायट समजूंक लागतकच समाज बदलूंक लागलो. बरो बदल हो जायच आनी गरजेचो.
तातूंत कित्याक बदलची न्हय आमची मनशाच्या आंगा कडेन पळोवपाची नदर? जर कोणाकय नग्नतायेंत सौंदर्य दिसता जाल्यार ती ताची निवड न्हय? आनी जर कोणाक नग्नतायेंत आंदोलन करपाचें बळगें मेळटा जाल्यारूय ती ताची निवड. पूण तीच नग्नताय जर खंयच्या भोग्याक बुरशे विचार आनी कृती करपाक प्रवृत्त करतात जाल्यार ती ते बुरशे प्रवृत्तीची आनी विचारांची समस्या, नग्न आंगाची न्हय. तेन्ना, खंयचेय वायट कृती वेळार आमी कृती करप्याक दोश दिवंक शिकुया, जाचे आड वा जाचेर कृती जाता ताका न्हय. नग्नतायेंत सौंदर्य आसता हें आमकां जायतीं शिल्पां, कलाकृत्यो दाखोवन दितात मागीर खंयच्याय मनशान – दादलो जांव बायलेचे नग्नतायेंत फकत काम भावना पळोवचे परस सौंदर्य सोदल्यार कशें? घडये आमच्या मनाकय आमी मातशीं नग्न करुया? संकुचीत विचारांच्या कपड्यांतल्यान?
डॉ. तन्वी कामत बांबोळकार
9764780497
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
