भांगरभूंय | प्रतिनिधी
पर्वरे मुथूट फायनान्सच्या 9 रिणकारां आड गुन्यांव
भांगरभूंय । प्रतिनिधी
म्हापशें: पर्वरे मुथूट फीन को ऑपरेटिव्ह लिमिटेड ह्या फायनान्स कंपनीच्या फांट्यांतल्यान नकली भांगर घाणाक दवरून रिणाच्या रुपांत 20 लाख 85 हजार रुपयांची कंपनीक तोपी घाली. ह्या प्रकरणांत पर्वरी पुलिसांनी णव रिणकारां आड गुन्यांव दाखल केला.
दुबावितां मदीं अक्षय कृष्णा पवार (रा. पोरणें आराडी, कांदोळी), गौतमी पार्सेकार (रा. आराडी, कांदोळी), मलिकसाब चांदसाब नदाफ (रा. आनावाडो, कांदोळी), विश्रांती नानोडकार (रा. साळपें, कांदोळी), मंजूनाथ नागराज नायक (रा. आंबेखंड, नेरूल), गीता कुंडयकार (रा. सावतावाडो, कळंगूट), प्रकाश रामन्ना दोडामणी (रा. आराडी, कांदोळी), जाफर खुदबूद्दीन बेपारी (रा. कोटारभाट, हळदोणें) आनी किशोर गोपाळ चव्हाण (रा. आराडी कांदोळी) हांचो आस्पाव आसा.
हो फटवणुकीचो प्रकार फाटल्या 23 जून 2022 ते 6 जुलय 2022 ह्या काळांत घडलो. ह्या प्रकरणांत फांट्याचे वेवस्थापक प्रणिता पिळर्णकार हांणी पुलिशेंत कागाळ दाखल केल्या.
दुबावितांनी मुथूट फीन को ऑपरेटिव्ह लिमिटेड फायनान्स कंपनीच्या पर्वरे फांट्यांत रिणां खातीर अर्ज केलो आनी भांगर घाणाक दवरून 20 लाख 84 हजार 999 रुपया रीण काडलें. कालांतरान हें घाणाक दवरिल्लें भांगर नकली आशिल्ल्याचें कंपनीक दिसून आयलें.
उपरांत बुधवारा
कागाळदार वेवस्थापकान पर्वरी पुलीस स्टेशनार रितसर कागाळ दाखल केली. ह्या कागाळीच्या आदारान पुलिसांनी वयल्या दुबावितां आड भादंसंच्या 420 आनी 34 कलमा खाला गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
