भांगरभूंय | प्रतिनिधी
म्हादय प्रस्नाचेर कर्नाटकाचो डीपीआर केंद्र सरकारान मानून घेतले उपरांत गोंयांत खवदळ जावप सभावीक. आतां डीपीआराक दिल्ली मान्यताय फाटीं घेवची ही मागणी घेवन गोंय सरकाराचें शिश्टमंडळ आयज दिल्लीं वतलें. गृहमंत्री अमित शहा हांकां आमचे मुख्यमंत्री आनी हेर मंत्री मेळटले. तांकां गोंयची बाजू पटोवन दितले. विरोधकांनीय आंदोलनाची गाडी निकतीच गियरांत घाल्या. मात तांचे मदीं एकवट ना, हें आरजीचे ‘एकला चलो रे’ भुमिके वयल्यान दिसून आयलां. घडये 16 तारखेक जावपी विधानसभा अधिवेशना वेळार सगले विरोधकांच्या आंदोलन रुपी धोलार तोंणी पडटली. तसो तो वाजपाक लागला…. तेच दीस जनमत कौल जाल्लो. गोंयचें स्वतंत्र अस्तित्व तिगोवपाक मतदान जाल्लें. उपरांत निकाल गोंय स्वतंत्र दवरूंक सोदप्यांचे वटेन लागलो. आतां गोंयचे समाजीक, संस्कृतीक जिणेक योगदान दिवपी म्हादय संकश्टांत आसा. तिका आपापले परीन वांचोवपाचे यत्न सुरू जाल्यात. तांकां येस मेळूं अशें मागुंया.
म्हादय बचाव अभियानाच्या फुडाऱ्यांक ह्या म्हादय प्रस्नाचीं धोंगांपोंगां खबर आसात. सरकारी घटकांनी, नवे पिळगेन तांचे कडल्यान ते समजून घेवपाक जाय. काल मुख्यमंत्री डाॅ. प्रमोद सावंत हांणी बसका घेवन तांचें म्हणणें आयकून घेतलें. हेंच आदल्या सरकारांनीय पयलींच आयकून ते प्रमाण पावलां उखलिल्लीं जाल्यार आयज म्हादयचो प्रस्न इतलो किचकट जावचो नाशिल्लो. आतां आदलीं मडीं उस्तुन फायदो ना. एकमेकांक बोटां दाखोवचे परस सगल्यांनी मूठ घट करूनच लढपाक मैदानार देंवचें. ‘बंद मुठ्ठी लाख की, खुल गई तो खाक की’ हें मात खंयचेच परिस्थितींत जावपाक दिवचें न्हय. आतां ना तर केन्नाच ना, अशी परिस्थिती सध्या आसा. कर्नाटकाक गोंयचे म्हादयचेर दोळे दवरचे परस हेर न्हंयो आशिल्ल्यो, हुबळीक पिवपाच्या उदकाची पुरवण करपाक. गोंय पिटुकलें, तें कितें करतलें, अशें तांकां दिसलें आसतलें. पूण, मूंय पसून हतयाक नाका शेवट करपाक शकता, हें तांकां दाखोवन दिवपाचो वेळ आयला.
कळसा – भांडुराचें उदक बेकायदेशीरपणान वळोवन रानां जीव संरक्षण कायदो माड्डुपाचें कर्म कर्नाटकान केलां, असो दावो रानां खात्याचे मुखेल वाॅर्डनान केला. ते संबंदी मुख्य सचीव आनी कर्नाटक निरावरी निगम लिमिटेडाक नोटीस धाडल्या. म्हयन्या भितर जाप दिवपाक सांगलां. मात, कर्नाटक तिका धूप घालीत अशें दिसना. सर्वोच्च न्यायालयांत गोंयचे याचिकेचेर 5 जानेवारीक जावपी सुनावणी अचकींत रद्द जाली. आतां ती घेवची, अशी मागणी करपी अर्ज गोंय सरकारान केला. केंद्रीय अधिकारी कळसा, भांडुरा पळोवन गेल्यात.
जैवीक नदरेन हो वाठार सामको म्हत्वाचो. कळसा, भांडुरा म्हादय अभयारण्यांत येतात. भीमगड अभयारण्यय थंयच आसा. दोनूय अभयारण्यां गिरेस्त. गवाळी- तळेवाडी, कृष्णापूर हांगां दुर्मीळ वागोळ्यांची (पांखे) प्रजाती आसा. मँगनीज, चुनो, खडी आनी हेर खनीजूय थंय मेळटा. काळो बिबटो, दांडो वाघ, वाशेंलां, किंग कोब्रा, बेबे हे सारके प्राणी, जीव थंय आसात. मलबार परी सारको व्हडलो फुलपाखो हांगांच सांपडटा. आनीकय रानां जीव संपत्त थंय आसूं येता. वनस्पत आसा ती वेगळी. उदकाची पातळी देंवल्यारूय हे संपत्तीचेर हावळ येवं शकता. सैमीक नदरेन म्हत्वाचें आशिल्लीं तळीं, न्हंय, जलस्रोत कायद्यान नश्ट करपाक मेळनात. हो मुद्दो आमी लावन धरल्यार म्हादयच्या फावराद निवाडो जावपाक शकता.
जाय तितलें उदक वळयलें जाल्यार उदक उणें जावचें ना, अशें कांय जाणकारांक दिसता. ते विशीं ‘भांगरभूंय’ चे आयतार पुरवणेंत (8 जानेवारी) एक लेख आयला. कृष्णा न्हंये सयत साबार न्हंयांचेर दोना परस चड धरणां, बांद उबारल्यात. पूण खंयचीच न्हय आटूंक ना, अशें तातूंत म्हणलां. हें खरें आसलें तरी, आमी शिटूक राविल्ले बरें. धरणांक लागून उदकाची पातळी कशी वाडटा, देंवता तें गोंयकारांनी प्रत्यक्ष पळयलां. देशभरांत रस्त्यांचें जाळें विणपाचें काम नेटान चल्लां, तशें व्हडल्यो, हुंवार हाडपी न्हंयो एकामेकांक जोडल्यार उदक उणें आसा, त्या राज्यांक फायदो जातलो. केंद्रान त्या कामाकूय वेग हाडप गरजेचें. तेवटेन कर्नाटकांतले कांय फुडारी गोंयचेर फुरफुरपाक लागल्यात. ह्या प्रकरणाक राजकी मोडण दिवपाचो यत्न जातलो. देखून तो समाजीक प्रस्नच उरतलो, हाचे कडेन सगल्यांनी लक्ष दवरचें पडटलें. 19 जानेवारीक विधानसभेंत म्हादयचेर चर्चा जातली. तातूंतल्यानूय कितें तरी बरें येवं. फुडाराचे डावपेच भायर सरूं. म्हादय माय गोंयचें भूशण आसा, तें बिरुद तशेंच उरूं. आमेन.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
