धेंपो क्रिकेट क्लब वस्ताद

भांगरभूंय | प्रतिनिधी

धेंपो क्रिकेट क्लबान बांदोडकार टी-20 क्रिकेट सर्तीचें वस्तादपण जोडलें. बांदोडकार क्रिकेट मैदानाचेर जाल्ले फायनलींत ताणें करिमाबाद क्रिकेट क्लबाक 7 विकेटींनी हारयलो. पणजी जिमखानान सर्तीचें आयोजन केल्लें.

करिमाबाद क्रिकेट क्लबान पयलीं बॅटींग करतना निर्धारीत 20 ओव्हरींनी 9 विकेटी वगडावन 116 धांवड्यो केल्यो. मुखेली दीपराज गांवकारान सगल्यांत चड 22 धांवड्यो केल्यो, ताचे खेरीत लकमेश पावणेन नाबाद 21 धांवड्यांचें योगदान दिलें. धेंपो क्रिकेट क्लबा वतीन अझीम काझीन 3 जाल्यार जगदीश पाटील आनी विकास सिंग हाणें दरेकी 2 विकेटी घेतल्यो.

धेंपो क्रिकेट क्लबान 12 बॉल राखून आनी फक्त 3 विकेटी वगडावन मोख मेळयली. मुखेली स्नेहल कवठणकारान 40 धांवड्यांचें योगदान दिलें. 30 बॉलांक तोंड दितना चार चवके आनी एक सको मारलो. ताचे खेरीत मुकूल कसन हाणें 35 धांवड्यो केल्यो. दोगांयनी मेळून पयले विकेटी खातीर 74 धांवड्यांची भागिदारी करून धेंपोच्या जैताचें मुळावण घालें. करिमाबादा वतीन सगल्यो विकेटी सचिन मिश्रान घेतल्यो.

समीर काकोडकार इनाम भेटवण सुवाळ्याक मुखेल सोयरे म्हणून उपस्थीत आशिल्ले.

थोडे भितर धांवतकटोः करिमाबाद क्रिकेट क्लब, 20 ओव्हरींनी 9 बाद 116 धांवड्यो ( कश्यप बखले 15, तुनीष सावकार 12, अझान थोटा 10, दीपराज गांवकार 22, वेदांत नायक 11, लकमेश पावणे नाबाद 21 धांवड्यो, दिव्यांग हिंगणेकार 1-19, जगदीश पाटील 2-19, अझीम काझी 3-29, विकास सिंग 2-18) हार आड धेंपो क्रिकेट क्लब, 18 ओव्हरींनी 3 बाद 120 धांवड्यो (स्नेहल कवठणकार 40, मुकूल कसन 35, किनन वाझ 17, विकास सिंग नाबाद 19 धांवड्यो, सचिन मिश्रा 3-21).

वैयक्तीक इनामांः

विकास सिंग (मॅन ऑफ द मॅच पुरस्कार, धेंपो क्रिकेट क्लब), तुनीष सावकार (उत्कृश्ठ बॅट्समन, करिमाबाद क्रिकेट क्लब), अझीम काझी (उत्कृश्ठ बॉलर, धेंपो क्रिकेट क्लब), दिव्यांग हिंगणेकार (मॅन ऑफ द सिरीज पुरस्कार, धेंपो क्रिकेट क्लब).