भांगरभूंय | प्रतिनिधी
तीन पुलीस कर्मचारी जखमी
फोंडें: धारदांबोड्यां संजिवनी साकर कारखान्याच्या पेत्रॉल पंपा मुखा वयल्या रस्त्यार मंगळारा रातीं वट्ट तीन वाहनां मदीं जाल्ल्या अपघातांत तीन पुलीस कर्मचारी जखमी जाले. अपघातांतल्या जखमींचेर गोमॅकाँत उपचार सुरू आसात. फोंडें पुलिसांनी अपघाताचो पंचनामो केला.
धारबांदोडें सावन तिस्क उसगांवां वचपी जीए 12 ए 0836 क्रमांकाचे मोटारीक जीए 12 बी 1048 आनी जीए 09 जे 6446 ह्या दोन दुचाकींचो धपको बसलो. हातूंत अविनाश मायरेकार (28, मेटावाडो -धारबांदोडें), प्रकाश वस्त (38, तामसडो-धारबांदोडें) आनी दिव्या वराक (35, पेटके- धारबांदोडें ) हे तीन पुलीस कर्मचारी जखमी जाले. जखमींक 108 अॅम्ब्युलन्सींतल्यान पिळयें धारबांदोड्यां मुळाव्या भलायकी केंद्रांत दाखल केले. उपरांत फुडल्या उपचारा खातीर जखमींक गोमॅकाँत धाडून दिले. फोंडें पुलिसांनी अपघाताचो पंचनामो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
