धर्म वेगळो तरीय सगल्यांचो देव एकूच

म्हापशें मुस्लीम फेडरेशन आयोजीत कार्यावळींत उलयतना फा. रोमिनो लुईस. कुशीक अ‍ॅड. रमाकांत खलप, आसीफ युसूफ, डॉ. फिरोज खान, नुरुद्दीन शेख आनी हेर.

भांगरभूंय | प्रतिनिधी

अ‍ॅड. रमाकांत खलपः म्हापशें मुस्लीम फेडरेशनान घडोवन हाडली सर्वधर्म समभाव कार्यावळ

भांगरभूंय । प्रतिनिधी

म्हापशेः देवान निर्मिती केल्ले हे सृश्टींतले सगळे एकाच देवाचे अंश. धर्म वेगळो आसलो तरीय सगळ्यांचो देव एकूच. गीता, कुराण आनी बायबल हांची शिकवण लेगीत तेंच सांगता. भगवान श्रीकृष्ण, देवदूत महम्मद पैगंबर आनी देवदूत जिझस क्रायस्ट हांचें भुरगेंपण गोरवां वांगडा गेलें. तिगांचोय जल्म जाले उपरांत आपले आवय पासून तांकां पयस रावचें पडलें, अशें सारकेंपण दिसता, अशें आदले केंद्रीय मंत्री अ‍ॅड. रमाकांत खलप हांणी सांगलें.

म्हापशेंच्या म्हापशें मुस्लीम फेडरेशनान ईद मिलाद सणा निमतान हॉटेल मयुराच्या सभाघरांत आयोजीत सर्वधर्म समभाव कार्यावळींत मुखेल उलोवपी म्हूण अ‍ॅड. खलप उलयताले. ह्या वेळार माचयेर फा. रोमिनो लुईस, असीफ हुसेन, नुरुद्दीन शेख आनी हेर मानेस्त हाजीर आशिल्ले. तशेंच नगराध्यक्ष शुभांगी वायंगणकार प्रेक्षकां मदीं हाजीर राविल्ली.

आपल्या अभ्यासपूर्ण उलोवपांत अ‍ॅड. खलप हांणी सांगलें, ह्या सगळ्यांची जीणेशैली, धर्मग्रंथ आनी आचरण वेगळें आसलें तरीय सगळे एकाच देवाचीं भुरगीं आनी सगळ्यांचो देव एकूच आसा. कोण ताका अल्ला म्हणटा, कोण जिझस जाल्यार कोण भगवान म्हणटा. हेच खातीर धर्मां मदले भेद विसरून एकचारान रावप योग्य जातलें.

फा. रुमिनो लुईस हांणी सांगलें, धर्माच्या नांवान गरजेभायर गोंदळ घालतात. सगळ्या धर्माचें सार एकूच आसा. देव सगळ्यांचेर एकेच भशेन मोग करता. गरिबांक, अडिल्ल्या नडिल्ल्यांक तशेंच दुखेस्तांक लागीं करून मोग दिवपी व्यक्ती देवाक आवडटा आनी धर्म लेगीत तेंच सांगता. डॉ. फिरोज खान हांणी येवकार दिलो आनी प्रास्तावीक केलें. नुरुद्दीन खेळ हांणी सुत्रसंचालन केलें आनी उपकार मानले.

पृथ्वीची राखण करप आमची लागणूकः युसूफ

मनीस गोंदळिल्ले अवस्थेंत आसा. ताका लागून ताका योग्य मार्गदर्शन करचे खातीर देव आपल्या दूताक धाडटा. सगळे देवदूत मनशांच्या मनांतलें वायटपण पयस करचे खातीर जल्म घेतात आनी देवा मेरेन वचपाचो मार्ग सुचयतात. सगळ्यांची शिकवण एकूच आसता. देवदुतांच्या मार्गदर्शना प्रमाण आचरण करून पृथ्वीची राखण करप आमची लागणूक. इस्लाम धर्माचे जनक लेगीत देवूच आसात, अशें समाज वावुरपी आसिफ हुसेन युसूफ हांणी सांगलें.