भांगरभूंय | प्रतिनिधी
आयज आंतरराष्ट्रीय मळाचेर अणकार आनी अणकारिल्ल्या साहित्याची म्हत्वाची जाणीव लेखक, वाचक आनी संशोधकांक जाल्ली आसा. लेखक पुस्तक रचतात, अनुवादक एका लेखकाचीं उतरां तांच्याच दृश्टीकोणांतल्यान विंगड विंगड भाशेंतल्या वाचकां मेरेन पावयतात, देखून एका अनुवादकाची जबाबदारी दुपट्ट जाता म्हणल्यार ती वाडटा.
गोंयच्या साहित्यांतूय आयज अणकाराचो प्रभाव दिसता. कोंकणींतलीं बेस बरी पुस्तकां हेर भाशेंतल्यान गोंयच्या भायल्या वाचकां मेरेन पावल्यांत, तशेंच दुसरे भाशेंत रचिल्लीं पुस्तकांय कोंकणी वाचकांच्या हातांत पावल्यांत. गोंयच्या अणकारिल्ल्या साहित्याचें एक घटमूट आनी नवें रूप “द वेट एण्ड अदर स्टोरीस” ह्या पुस्तकांतल्यान निर्माण जालां. द वेट एण्ड अदर स्टोरीस हो ज्ञानपीठकार साहित्यीक दामोदर (भाई) मावजो हांचो कथा झेलो. ह्या काणयांचो अणकार झेवियर कॉता हांणी केला. तांणी दामोदर मावजो हांचीं आनिकूय पुस्तकां अणकारीत केल्यांत. द वेट हो कथा झेलो पँग्विन रँडम हावज ह्या नामनेच्या प्रकाशन संस्थेन उजवाडाक हाडला. पँग्विन संस्थेचीं पुस्तकां भारतांतूच न्हय तर जगभर पावतात आनी दामोदर मावजो हांचें हें पुस्तक गोंयच्या साहित्याक
प्रखरपणान फुडें व्हरपाक लेखकांक आनी कोंकणी मनशाक उर्बा दितले हातूंत दुबाव ना.
ह्या पुस्तकांत “तिश्ठावणी” ह्या कथा झेल्यांतल्यो काणयो आसात. ते भायर भाईन रचिल्ल्यो हेर काणयांचोय आसपाव तातूंत केला. पुस्तकांतल्यान लेखक आनी अनुवादकाचें नातें अणभवता. झेवियर कॉता हे फक्त भाईचीं उतरां न्हय तर तांचे विचार, तांचो दृश्टीकोण, तांची भावना आनी तांच्या पात्रांचेर आशिल्लो तांच्या उपाट मोगाचो अणकार करतात. अणकार हो फक्त उतरां मेरेनूच सिमीत उरना, हे झेवियर कॉता सिद्ध करतात.
भाईच्या काणयांक एक गती आसता. वाचक फुडल्या पानार पावपाक उत्सूक आसतात. तांचे काणयेंत आकर्शक संवाद आसतात आनी ह्या संवादाचो गाभो आनी कथानकाची गती अनुवादक कॉता हांणी बेस बरे तरेन सांबाळ्ळ्या. पुस्तकांत चवदा काणयो आसात. “द वेट”, “द लवर ऑफ ड्रीम्स”, “जँटलमॅन थीफ”, “बर्गर” अशा माथाळ्यांचो काणयो ह्या पुस्तकांत आसात. काणयो गोंयकारांच्यो आनी सामान्य भारतीय लोकांच्योय, काणयो तरणाट्यांच्यो आनी आधुनीक समाजांचें पडबिंब अशें वाचकांक जाणवतात. “जँटलमॅन थीफ”, “बर्गर”, “आय वाॅझ वेटिंग फॉर यू”, “द कावर्ड” ह्यो रचना अप्रूप अशें म्हणप चुकीचें थारचेना.
हें पुस्तक हालींच उजवाडाक आयलां आनी गोंयचें समेस्त इंग्लिश साहित्य मोगी, साहित्यीक, आनी इंग्लिश साहित्यांत शिक्षण घेवपी तरणाट्यांनी हें पुस्तक वाचप आनी ताचेर चर्चा वा संशोधन करप गरजेचें.
गौरवी केणी खंवटे
7798791183
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
