भांगरभूंय | प्रतिनिधी
नव्या परिपत्रकांत निर्देश, अदीक शुल्क वगळ्ळे
भांगरभूंय I प्रतिनिधी
पणजी : दुयेंतीच्या घरच्या कडल्यान अदीक शुल्क आकारून निमाण्या खिणाक सरकारी हॉस्पिटलांत धाडपी खाजगी हॉस्पिटलांची चवकशी करून तांचे कारवाय करपा विशींच्या परिपत्रकांत खात्यान शुक्रारा बदल केला. तशेंच हातूंतले अदीक शुल्क काडून नवे परिपत्रक जारी केलां. हाचे वयल्यान राज्यभरांतल्या खाजगी हॉस्पिटलांच्या वेवस्थापनांत खवदळ पडला.
भलायकी खात्यान पयलीं जारी केल्ल्या परिपत्रकां तल्यान ‘अदीक शुल्क काडून’ नवे परिपत्रक जारी केलां. दुयेंतींक निमाण्या खीणाक सरकारी हॉस्पिटलांत धाडपी खाजगी हॉस्पिटलांची चवकशी करून तांचेर कारवाय करपाचे निर्देश नव्या परिपत्रकांत दिल्यात.
मजगतीं, राज्यांतल्या जायती खाजगी हॉस्पिटलां निमाण्या खिणा मेरेन दुयेंतीक हॉस्पिटलांत दवरून घेतात आनी दुयेंतीची भलायकी इबाडले उपरांत तांच्या घरच्या कडल्यान केल्लो खर्च घेवन ताका सरकारी हॉस्पिटलांत व्हरपाक सांगतात. अशा प्रकारांक लागून दुयेंतीच्या घरच्यांक व्हड मनस्ताप सोंसचो पडटा. तशेंच दुयेंती जिवे उरपाची खात्री
नासता.
ताका लागुनूच निमाण्या खिणाक दुयेंतीच्या घरच्या कडल्यान खर्च घेवन दुयेंतीक गोंय वैजकी म्हाविद्यालया सयत (गोमॅको) आनी हेर सरकारी हॉस्पिटलांनी धाडपी खाजगी हॉस्पिटलांची चवकशी जातली. अशें प्रकार करपी खाजगी हॉस्पिटलांचेर कारवाय जातली, अशें निर्देश भलायकी खात्यान गोमॅकॉचे डीन, भलायकी संचालक, बांबोळेंतल्या दांत म्हाविद्यालयाचे डीन, मानसोपचार अानी मनीस वर्तन संस्थेचे (आयपीएचबी) डीन हांकां दिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
