दिवचल बायपास मे मेरेन उक्तो

दिवचलच्या बायपास रस्त्याच्या कामाची पळोवणी करतना मुख्यमंत्री डॉ. प्रमोद सावंत. कुशीक आमदार डॉ. चंद्रकांत शेट्ये आनी अधिकारी. (विशांत वझे)

भांगरभूंय | प्रतिनिधी

मुख्यमंत्रीः रस्त्याची आमदारा सयत केली पळोवणी

भांगरभूंय । प्रतिनिधी

दिवचलः व्हाळशी ते वाठादेव ह्या सुमार 5 किलोमिटर अंतराच्या बायपास रस्त्याचें काम मे मेरेन पुराय करून तो येरादारी खातीर उक्तो करतले. हो बायपास उक्तो जाले उपरांत दिवचल शारा वयलो येरादारीचो ताण खूब प्रमाणांत उणो जातलो. तेच वांगडा पार्कींगची समस्या लेगीत कांय प्रमाणांत सुटावी जातली, अशें मुख्यमंत्री डॉ. प्रमोद सावंत हांणी सांगलें.

मुख्यमंत्री डॉ. सावंत हांणी शेनवारा बायपास रस्त्याच्या कामाची पळोवणी केली. ह्या वेळार आमदार डॉ. चंद्रकांत शेट्ये, कार्यकारी अभियंते आत्माराम गावडे, सहाय्यक अभियंते दिनेश तारी हाजीर आशिल्ले.

हो बायपास रस्तो सुमार 70 कोटी रुपया खर्च करून बांदतात. दिवचल शारा खातीर ताचो खूब उपेग जातलो. ह्या रस्त्याचेर तीन पूल बांदतले, ताचें 80 टक्के काम पुराय जालां. उरिल्लें काम पावसा आदीं पुराय करून हो रस्तो येरादारी खातीर उक्तो जावचो, हे खातीर आदेश दिल्यात, अशी म्हायती मुख्यमंत्री डॉ. सावंत हांणी दिली. आमदार डॉ. शेट्ये हांणी सांगलें, हो बायपास रस्तो येरादारी खातीर फायद्याचो आसाच. तेचवरी दिवचल शारांतलो येरादारीचो अतिरिक्त ताण उणो करपाक तो म्हत्वाचो थारतलो. तो बेगिनात बेगीन उक्तो करचे खातीर खात्याचे यत्न सुरू आसात. पावसा आदीं हें काम पुराय जातलें, असो विस्वास डॉ. शेट्ये हांणी उक्तायलो.