भांगरभूंय | प्रतिनिधी
मगोच्या दोन नगरसेवकांचें भाजपाक फाटबळ
दिवचल: दिवचल पालिका उपनगराध्यक्षाच्या पदार सुखदा तेली हांची बिनविरोध निवड जाली. फुडली घोशणा आयज जावपी बसकेंत जातली.
दिवचल उपनगराध्यक्षपदार आशिल्ली तनुजा गांवकार हांचे आड आठ नगरसेवकांनी कांय दिसां पयलीं अविश्वास थाराव दाखल केल्लो. पूण कांय दिसांनी तनुजा गांवकार हांणी राजिनामो दिल्ल्यान हें पद रितें आशिल्लें.
मजगतीं, मगो गटांतली नगरसेविका सुखदा तेली आनी रंजना वायंगणकर हांणी भाजपाक आपलें फाटबळ कांय दिसां पयलीं जाहीर केल्लें. उपरांत सुखदा तेली हांचें नांव उपनगराध्यक्षपदा खातीर निश्चीत जालें.
काल सुखदा तेली हांचो एकूच उमेदवारी अर्ज सादर जाल्ल्यान तांची बिनविरोध निवड जाली. शुक्रारा, सकाळीं 11 वरांचेर आयोजीत विशेश बसकेंत निर्वाचन अधिकारी दीपक वायंगणकार फुडली घोशणा करतले.
मजगतीं, बिरेस्तारा सकाळीं सुखदा तेली आनी रंजना वायंगणकार हांणी नगराध्यक्ष कुंदन फळारी, अनिकेत चणेकार, निलेश टोपले, विजयकुमार नाटेकार, सुदन गोवेकार, दिपा पळ हांचे हाजेरींत मुख्यमंत्री डॉ. प्रमोद सावंत हांची भेट घेतली आनी भाजप गटाक आपले फाटबळ जाहीर केलें. मुख्यमंत्र्यान सुखदा तेली, रंजना वायंगणकार हांकां फुलांचे तुरे दिवन परबीं भेटयलीं.
मगो फुडारी आदले आमदार नरेश सावळ हांचे समितीच्या दोन नगरसेवकांनी भाजपाक फाटबळ दाखयलें.
हे विशीं आमदार डॉ. चंद्रकांत शेट्ये हांकां विचारलें तेन्ना, पालिका मंडळाच्या राजकारणांत आपलो कसलेच तरेचो हस्तक्षेप ना. उदरगत हो आपलो अजेंडा आशिल्ल्यान शार आनी गांवगिर्या वाठारांची पुरायेन उदरगत करतना सगळ्यांक वांगडा घेवन मुख्यमंत्र्यांच्या सहकार्यान खूबश्यो येवजण्यो पुराय करप. हाचे कडेन आपलें लक्ष आशिल्ल्याचें तांणी सांगलें.
आदले सभापती राजेश पाटणेंकार हांकां संपर्क केलो तेन्ना ते गोंयां भायर आशिल्ल्यान तांकां संपर्क जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
