दिल्ली कॅपिटल्साचें झणझणीत जैत

भांगरभूंय | प्रतिनिधी

खबरां संस्था

मुंबयः इंडीयन प्रिमीयर लिगेचे (आयपीएल) 32वे मॅचींत दिल्ली कॅपिटल्सान पंजाब किंग्साक 9 विकेटींनी हारयलो. पयलीं बॅटींग करपी पंजाब किंग्सान फक्त 116 धांवड्यांची मोख दिल्ली. ती दिल्ली कॅपिटल्सान 10.3 ओव्हरींनी फक्त एक विकेट वगडावन मेळयली. दिल्लीच्या डॅव्हीड वॉर्नरान 200चे स्ट्रायक रेटीन 60 धांवड्यो केल्यो.

दिल्लीचो दुसरो ओपनर पृथ्वी शॉ हाणें लेगीत ताबडतोड बॅटींग करतना 20 बॉलांनी 41 धांवड्यो केल्यो. दोगांयनी पंजाबाक मॅचींत येवपाची कसलीच संद दिली ना. ह्या जैता सयत दिल्ली सवे सुवातेर पावलो. जाल्यार पंजाब आठवे सुवातेर आसा.

मॅच सुरू जावचे आदींच दिल्ली कॅपिटल्सा खातीर वायट खबर आयिल्ली. विकेटकीपर बॅट्समन टीम शॅफर्ट कोरोना पॉझिटिव्ह सांपलो. मॅच सुरू जावपाक साडेतीन वरां बाकी आसतना शॅफर्ट कोरोना पॉझिटिव्ह आशिल्ल्याचो अहवाल आयलो. ताचे पयलीं अश्टतासांचो खेळगडो मिचेल मार्श लेगीत कोरोना पॉझिटिव्ह सांपडिल्लो. अशे तरेन दिल्लीच्या संक्रीत जाल्ल्यांची संख्या सचेर पावली. हे दोन खेळगडे सोडले जाल्यार बाकीचे सपोर्ट स्टाफाचे वांगडी आसात. हुसक्याची गजाल आसून लेगीत दिल्ली जबरदस्त खेळ केलो आनी जैत जोडलें.

ते पयलीं दिल्ली कॅपिटल्साच्या स्पिनरांनी उत्कृश्ठ प्रदर्शन केलें. 6 विकेटी स्पिनरांनी घेतल्यो. अक्षर पटेलान दोन, कुलदीप यादवान दोन आनी ललित यादव हाणें दोन विकेटी घेतल्यो. पंजाबा वतीन सगल्यांत चड धांवड्यो जितेश शर्मान केल्यो. ताणें 32 धांवड्यांचें योगदान दिलें.

पयली बॅटींग करपी पंजाब किंग्साची सुरवात बरी जाली ना. मयंक अग्रवाल आनी शिखर धवन हे ओपनर परतून एकदा आपल्या पंगडाक बरी सुरवात करून दिवपाक अपेशी थारले. धवन 10 बॉलांनी 9 धांवड्यो केल्यो. मयंकान 24 धांवड्यो केल्यो. धवनाक ललितान आनी मयंकाक मुस्तफिजूर रहमान हाणें बाद केलो.

दोनूय ओपनर सवाय भितर बाद जाल्या उपरांत व्हड स्कोर उबारपाची जापसालदारकी मदले फळयेचेर आयली. पूण, बॅयरस्टो आनी लिव्हींगस्टोन हांणी निर्शेणी हाडली. बॅयरस्टोक अंदूंच्या हंगामांत अजून मेरेन एकूय व्हड खेळी करपाक जमूंक ना. फक्त णव धांवड्यो करून खलील अहमदाच्या बॉलाचेर कॅच बाद जालो. लिव्हींगस्टोन हाका लेगीत दर्जेदार प्रदर्शन करपाक जमलें ना. तो दोन धांवड्यो करून तंबूंत परतलो.