भांगरभूंय | प्रतिनिधी
नवी दिल्लीः दिल्लीचे भलायकी मंत्री आनी आम आदमी पक्षाचे (आप) ज्येश्ठ फुडारी सत्येंद्र जैन हांकां ईडीन अटक केल्या. जैन हांकां 4 कोटी 81 लाख रुपयांच्या मनी लाँड्रींग प्रकरणांत अटक केल्या. 2014-15त सत्येंद्र जैन मंत्रीपदार आसतना तांणी आनी तांच्या सहकाऱ्यांनी कोलकाताच्या शेल कंपनी कडल्यान पयशे घेतिल्ल्याचो आरोप आसा.
ह्या प्रकरणांत ईडीन गुन्यांव दाखल करून हाचे पयलीं तांची चवकशी केल्ली. सुत्रांनी दिल्ले म्हायती प्रमाण सत्येंद्र जैन हांणी चवकशे मजगतीं प्रस्नांची योग्य जाप दिवंक ना. ते म्हायती लिपयताले. ह्याच कारणा वयल्यान तांकां अटक केल्या.
सत्येंद्र जैन हांचेर 8 वर्सां पसून फटीचो खटलो सुरू आसा. आतां मेरेन ईडीन जायते खेपे तांकां चवकशे खातीर आपयिल्ले. आतां परतून सुरवात जाल्या. कारण सत्येंद्र जैन हे हिमाचलचे वेंचणूक प्रभारी आसात. हिमाचलांत भाजपाक हार घेवची पडल्या. ताका लागुनूच सत्येंद्र जैन हिमाचलाक वच्चे न्हय, म्हूण तांकां अटक केल्या. हे प्रकरण फटीचे आसून कांय दिसांत तांची निर्दोश सुटका जातली, अशें मनीष सिसोदिया हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
