भांगरभूंय | प्रतिनिधी
दिल्ली कॅपिटल्सान आदलो वस्ताद कोलकाता नायट रायडर्साक 4 विकेटींनी हारयलो. इंडीयन प्रिमीयर लिगेंतली (आयपीएल) 41वी मॅच मुंबयच्या वानखेडे स्टेडियमाचेर जाली.
दिल्ली कॅपिटल्सान 147 धांवड्यांची मोख 18 ओव्हरींनी 6 विकेटी वगडावन मेळयली. डॅव्हीड वॉर्नरान 42 धांवड्यांची खेळी केली. जाल्यार रोवमॅन पॉवेलान 16 बॉलांनी 33 धांवड्यो करून नाबाद रावलो.
दिल्ली कॅपिटल्सान आठांतलें चवथें जैत जोडलें. जाल्यार कोलकातान स मॅची वगडायल्यात.
कोलकाता फास्ट बॉलर उमेश यादवान जबरदस्त बॉलींग करून पंगडाक जैत मेळोवन दिवपाचो यत्न केलो. ताणें चार ओव्हरींनी चार विकेटी घेतल्यो. ताणें ओपनर पृथ्वी शॉक शुन्याचेर बाद केल्या उपरांत डॅव्हीड वॉर्नर आनी मुखेली श्रेयश अय्यर (2) हाका तंबूची वाट दाखयली. ताणें अंदूंच्या हंगामांत णव मॅचींनी खेळटना 14 विकेटी घेतल्यात.
दिल्लीन आपल्यो पयल्यो दोन विकेटी फक्त 17 धांवड्यां भितर वगडायल्यो. ताका लागून ताचो डाव संकश्टांत दिसतालो. पूण, तिसरे विकेटी खातीर वॉर्नर आनी ललित यादव हांणी 49 बॉलांनी 65 धांवड्यांची भागिदारी करून पंगडाक परतून मॅचींत हाडलो.
ते आदीं टॉस हारल्या उपरांत पयलीं बॅटींग करपी कोलकाता नायट रायडर्सान 9 विकेटी वगडावन 146 धांवड्यो केल्यो. नितीश राणान अर्द शेंकड्याची खेळी केल्ल्यान कोलकाताक सन्मानजनक स्कोरा मेरेन पावप शक्य जालें.
कोलकातान आठवे ओव्हरींत 4 विकेटी वगडावन 35 धांवड्यो केल्ल्यो. अशा वेळार नितीश मैदानाचेर देंवलो. ताणें एक बाजू सांबाळून धरतना ताणें 34 बॉलांनी 57 धांवड्यांची खेळी केली. तीन चवक्यांचो आनी चार सक्यांचो आस्पाव आसा. नितीशान मुखेली श्रेयस अय्यरा वांगडा मेळून 48 धांवड्यांची भागिदारी केली. जाल्यार रिंकू सिंगा वांगडा 62 धांवड्यांची भागिदारी केली. कोलकाताच्या फक्त तीन बॅट्समनांक दोट्ट आंकडो हुपपाक शक्य जालो. नितीशा खेरीत मुखेली श्रेयस अय्यरान 42 आनी रिंकू सिंगान 23 धांवड्यो केल्यो.
दिल्ली कॅपिटल्सा वतीन कुलदीप यादवान जबरदस्त बॉलींग केली. ताणें तीन ओव्हरींनी 14 धांवड्यो दिवन 4 बॅट्समनांक तंबूंत धाडले. ताचे खेरीत फास्ट बॉलर मुस्ताफिजूर रहमानान चार ओव्हरींनी 18 धांवड्यो दिवन तीन विकेटी घेतल्यो.
हे मॅची खातीर दिल्ली कॅपिटल्सान दोन बदल केले. ताणें खलीद अहमद आनी सरफराज खान हांचे सुवातेर चेतन सकारिया आनी मिचेल मार्श हांकां निमाण्या इकरांत सुवात दिली. जाल्यार कोलकाता नायट रायडर्सान बाबा इंद्रजीत, अॅरोन फिंच आनी हर्षित राणा हांकां संद दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
