दिमित्री बेझस्ट्राकोव्ह वस्ताद

भांगरभूंय | प्रतिनिधी

गोंयांत स्थायीक जाल्लो 39 वर्सां पिरायेचो रशीयन बुद्दीबळ खेळगडो दिमित्री बेझस्ट्राकोवान केपें तालुको बुद्दीबळ संघटनेन घेतिल्ले चंद्रकांत नायक स्मृती पांचवे अखील गोंय उक्ते रॅपीड बुद्दीबळ सर्तीचें वस्तादपण जोडलें. ताणें आठ फेरयेंतल्यान सात गूण मेळयले.

सर्त गोंय बुद्दीबळ अस्थायी समितीची मान्यताय आशिल्ली. सर्तींत 102 खेळगड्यांनी वांटो घेतिल्लो. सात गुणां सयत आयुष पेडणेंकारान उपवस्तादपण जोडलें. दरेकी 6.5 गूण जाल्ल्या मंदार लाड आनी जॉय काकोडकार हांकां वळेरेन तिसरी आनी चवथी सुवात फावो जाली. ब्रॅण्डन पिरोझान स गुणां सयत पांचवी सुवात मेळयली.

आर्यन रायकार, अनीश नायक, अली अमानत, राघव लाड, आदर्श पटेकार, भिमाप्पा हरिजन, रुद्र नगर्सेंकार, दीप भाटीकार, रिषभ निपाणीकार, आलेक्स सिक्वेरा हांणी वळेरेन सवी ती 15वी सुवात मेळयली.

पिराय गटांत 7 वर्सां पिराये सकयल्या गटांत आर्यन नायक, विव्हान तारी, 9 वर्सां पिराये सकयल्या गटांत जोशुवा तेलीस, आर्यव्रत देसाय, स्कायला रॉड्रिग्स, रोशेल परेरा, 11 वर्सां पिराये सकयल्या गटांत कनिष्क सावंत, आरव चोपडेंकार, जेनिसा सिक्वेरा, राशेल परेरा, 13 वर्सां पिराये सकयल्या गटांत अथर्व सावळ, किर्क रॉड्रिग्स, श्री घोणसेकार, पुष्टी भोसले, वॅटरन गटांत सचिंद्र नायक, युवा गटांत ओम मडगांवकार हांकां, जाल्यार केपें तालुको पांवड्याचेर निवेश नायक, अर्थव सावंत देसाय, अंबर दलाल, समिक्षा गांवकार, विधी सावंत देसाय हांकां इनामां फावो जालीं.

इनामां भेटवण सुवाळ्याक राज्यसभा खासदार विनय तेंडुलकार, भौशीक बांदकाम मंत्री निलेश काब्राल, कुडचडेंची नगराध्यक्ष जेस्मिन ब्रागांझा, किशोर बांदेकार, शरेंद्र नायक हे उपस्थीत आशिल्ले.