भांगरभूंय | प्रतिनिधी
कॉंग्रेस पक्षाचे सचीव केसी वेणुगोपाल हांचो आदेश
पणजी : विधीमंडळ फुडारीपदाचेर नेमणूक जावंक ना म्हूण पक्षाचेर निरशेल्ले दिगंबर कामत हांची अखील भारतीय काँग्रेस समितीच्या कायम निमंत्रीतपदा वेल्यान हकालपट्टी केल्या. पक्षाचे सचीव के. सी. वेणुगोपाल हांणी हो आदेश जारी केला. फाटल्या सप्तकांत मायकल लोबो सयत दिगंबर कामती आड पक्षान अपात्रताय याचिका दाखल केल्या.
अधिवेशना पयली फाटल्या सप्तकांत काँग्रेस आमदार फुटपाच्यो हालचाली सुरू आशिल्ल्यो. दिगंबर कामत, मायकल लोबो हांचे सयत हेर कांय आमदार बसकेक नाशिल्ले. हाची गंभीर दखल घेवन काँग्रेस पक्षान अधिवेशनाच्या पयल्याच दिसा दिगंबर कामत आनी मायकल लोबो आड अपात्रतायेची याचिका दाखल केली. हाचेर अजून निर्णय जावपाचो आसा. विरोधी पक्ष फुडारीपदा वेल्यान मायकल लोबो हांकां काडचो म्हूण सभापतींक पत्र सादर केलां. आतां दिगंबर कामत हांची कायम निमंत्रीतपदा वेल्यान हकालपट्टी केल्या. आपूण ‘रिटायर्ड हर्ट’ आसा. पक्षाचें खंयचेंच पद हांव घेवचो ना अशें दिगंबर कामत हांणी सांगिल्लें. पक्षान तांचे आड कारवायेचे सत्र सुरूच दवरतना आतां कायम निमंत्रीतपद काडून घेतलां.
वेंचणुके उपरांत मायकल लोबो हांची विधीमंडळ फुडारीपदाचेर निवड जाली. हाका लागून दिगंबर कामत हे पक्षाचेर निरशेल्ले. ज्येश्ठ आमदार आसून लेगीत पद मेळ्ळें ना म्हूण ते निरशेल्ले. तेन्नाच अखील भारतीय काँग्रेस समितीच्या कायम निमंत्रीतपदाचेर तांची नेमणूक जाल्ली. आतां तांचे हें पद गेलां. दिगंबर कामत आनी मायकल लोबो हांणी भाजपाच्या संगनमतान काँग्रेस पक्ष फोडपाचे कारस्थान चलयलां असो आरोप प्रभारी दिनेश गुंडू राव हांणी केल्लो. कायम निमंत्रीतपदा वेल्यान काडिल्ल्यान दिगंबर कामत हे कसलो निर्णय घेतात? हाचे विशीं उमळशीक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
