भांगरभूंय | प्रतिनिधी
पणजी : हालीच काँग्रेसींतल्यान भाजपांत प्रवेश केल्ले दिगंबर कामत बिरेस्तारा गुजरातांत गेल्यात. राष्ट्रीय सर्ती खातीर आपूण गुजरातांत वता, अशें तांणी माध्यमां कडेन उलयतना सांगलें. तांचे गुजरात भोंवडेक लागून परतून राजकी मळार चर्चांक ओतो आयला.
दिगंबर कामत हांचे कडेन राज्याचे मुख्यमंत्रीपद दिवपाच्यो हालचाली सुरू आशिल्याची खबर एके राष्ट्रीय वाहिनीन दिल्या. ही खबर आयले उपरांत रोखडेच ते गुजरातांत वतात, हो फक्त योगायोग आसा वा हेर कितें? अशो चर्चा सुरू जाल्यात.
दिगंबर कामत, मायकल लोबो हांचे सयत काँग्रेसीच्या आठ आमदारांनी भाजपांत प्रवेश केला. भाजपांत प्रवेश करचे पयलीं लोबो तशेंच दिगंबर कामत हे बरेच खेपे दिल्लींत वचून आयिल्ले. दर खेपे आमची खाजगी भेट आशिल्याचे ते सांगताले. दोगायच्या दिल्ली भेटी उपरांत काँग्रेसीच्या आठ आमदारांनी भाजपांत प्रवेश केल्लो.
काँग्रेसीच्या आठ आमदारांच्या भाजपा प्रवेशा उपरांत मंत्रीमंडळ फेरबदलाची चर्चा आशिल्ली. दिगंबर कामत, मायकल लोबो आनी अालेक्स सिक्वेरा हांकां मंत्रीपदां मेळटलीं, अशी चर्चा आशिल्ली. आठ आमदारांच्या प्रवेशाक म्हयनो जालो तरी अजून मंत्रीमंडळांत बदल जावंक ना. मंत्रीमंडळांत बदल जावचो ना, अशें मुख्यमंत्री डॉ. प्रमोद सावंत हांणी सांगलां. मंत्रीमंडळ बदला विशीं आपणाक काय खबर ना, अशें दिगंबर कामत हांणी म्हणलां.
आठ आमदारांच्या भाजप प्रवेसा उपरांत सगले आमदार मुख्यमंत्री डॉ. प्रमोद सावंत आनी प्रदेश अध्यक्ष सदानंद तानावडे हांचे सयत दिल्लींत वचून आयले. दिल्लींत तांणी राष्ट्रीय अध्यक्ष नड्डा सयत केंद्रीय मंत्री अमीत शाह हांची भेट घेतली.
दिगंबर कामत हे मुख्यमंत्री जावचे पयलीं बरोच तेंप भाजपांत आशिल्ले. भाजपाच्या केंद्रीय फुडाऱ्यां कडेन तांचे बरे संबंद आसात. राज्याचे फुडारपण दिगंबर कामत हांचे कडेन दिवपाच्यो हालचाली सुरू आशिल्याची खबर राष्ट्रीय वाहिन्यांनी दिल्या. हे फाटभुंयेर परतून नेतृत्व बदल तशेंच मंत्रीमंडळ फेररचनेची चर्चा सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
