भांगरभूंय | प्रतिनिधी
डीआरआयची व्हड कारवाय, पांच दुबावितांक अटक
पणजी : केंद्रीय गुप्तचर संचालनालयाच्या (डीआरआय) गोंय विभागान मंगळारा फांतोड्डेर दाबोळी विमानतळार प्रतिबंधीत कॉम्बो ड्रोन, भांगर आनी हेर वस्तूंचे तस्करी प्रकरणांत दुबयच्यान आयिल्ल्या पांच प्रवाशांक अटक करून कारवाय केली.
वासीद अली खान (बिहार), जुनेदूल हक्क (मुंबय), जुनेत अफझल शेख (मुंबय), मोहम्मद अयुब (उत्तर प्रदेश) आनी मोहसीन राजा (उत्तर प्रदेश) हांकां पुलिसांनी ताब्यांत घेतल्या. तांचे कडल्यान 49.08 लाखांचे 38 प्रतिबंधीत डीजेआय मावीक, उच्च दर्जाचे कॉम्बो ड्रोन,, 1.11 कोटींचे 2.291 किलो ग्रॅम भांगर, 52.50 लाखाचे 4,379 पॅकेट्स, उच्च दर्जाचाे अमेरिकन तंबाखू आनी 8 पोरणें लॅपटाॅप मेळून 2 कोटी 12 लाख 61 हजार 92 रुपया मोलाच्यो वस्तू जप्त केल्यात.
ह्या प्रकरणांत मडगांवच्या पयलो वर्ग न्यायालयान अटक केल्ल्या दुबावितांचो जामीन भायरावन पांच दीस न्यायालयीन कादयेंत दवरपाचो आदेश दिला.
मेळिल्ले म्हायती प्रमाण, 19 एप्रीलाक फांतोड्डेर विदेशांतल्यान येवपी विमानांतल्यान उच्च दर्जाचे कॉम्बो ड्रोन तस्करी जावपाची आसा अशी म्हायती गुप्तहेरां कडल्यान केंद्रीय महसूल गुप्तचर संचालनालयाच्या गोंय विभागाक मेळिल्ली. ते प्रमाण डीआरआयच्या पंगडान दाबोळी विमानतळार सांपळो रचलो. शारजाच्यान आयिल्ले अॅर एरेबिया जी 9492 विमान देंवले. ह्या वेळार प्रवाशांच्या सामानाची तपासणी सुरू केली, तेन्ना एकाच तिकेटीचेर पांच जाण आयिल्ल्याची म्हायती मेळ्ळी. तशेंच तांचे कडेन 6 कार्डबोर्ड बॉक्स, 5 ट्राॅली बॅग आनी हेर ल्हान पावच अाशिल्ल्याची म्हायती मेळ्ळी. ह्या प्रवाशांची चवकशी करून तांच्या सामानाची झडटी घेतली. त्या वेळार वयले सामान तांच्या बॅगांनी सांपडले.
ह्या प्रकरणांत डीआरआयच्या पंगडान दुबाविता आड कस्टम कायदो 1962 कलम 77 आनी 111 खाला तशेंच बॅगेज नेम 2016 खाला कारवाय करून अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
