दक्षीण पश्चीम रेल्वेंचें काम कासावलेच्या लोकांनी केलें बंद

भांगरभूंय | प्रतिनिधी

भांगरभूंय । प्रतिनिधी
मुरगांवः दक्षीण पश्चीम रेल्वेन एके सुवातेंत स्थळाव्या पंचायती कडल्यान परवानगी घेनास्तना सुरू केल्लें काम गोंयचो एकवोट आनी कासावलेच्या लोकांनी बंद केलें. अशें बेकायदेशीर काम खपोवन घेवचे नात अशें लोकांनी सांगल्या उपरांत रेल्वे कामगार बांदकाम साहित्य घेवन गेले.
सर्वोच्च न्यायालयान हालींच दिल्ल्या आदेशा प्रमाण रेल्वेन दोन पदरी रेल्वे ट्रकाचें बांदकाम हळूहळू बंद करपाची गरज आसा. सध्या रेल्वेच्या 16 गाडयो सिंगल ट्रकाचेर कोळश्याची येरादारी करतात. सर्वोच्च न्यायालयान पूर्व दर्या देगे वयल्या कृष्णपट्टम बंदर कोळशो येरादारी खातीर वापरपाक सांगलां. थंय रेल्वेन मुळाव्यो सुविधा तयार केल्यात.
दक्षीण पश्चीम रेल्वेन दुसऱ्यांचे सुवातांनी केल्ल्या अतिक्रमाक गोंयचो एकवोटाचो विरोध आसा. इसोर्सी तें आरोशी मेरेन रेल्वेचें हें अतिक्रमण चल्लां. ताका लागून कायदो आनी सूवेवस्थेचो प्रश्न उप्रासपाक शकता अशी शिटकावणी गोंयचो एकवोटान रेल्वे अधिकाऱ्यांक दिल्या.