भांगरभूंय | प्रतिनिधी
एके सेविकेची भलायकी इबाडली, पूण हॉस्पिटलांत वचपाक न्हयकार
पणजी: फाटले स दीस आझाद मैदानार बेमुजत उपोशण करपी त्या आंगणवाडी सेविकांची भलायकी इबाडत आसा. उपोशणाक बशिल्ली देवयानी ह्या सेविकेची काल (सोमारा) भलायकी इबाडिल्ल्यान अॅम्ब्युलन्स आपयली तरिपूण तांणी हॉस्पिटलांत वचपाक न्हयकार दिलो. काल ह्या उपोशणाक बशिल्ल्या आंगणवाडी सेविकांची गोवा फॉरवडाचे फुडारी दुर्गादास कामत आनी हेर वांगड्यांनी भेट घेवन तांकां गोवा फॉरवर्डा पक्षा वतीन तेंको दिलो.
मागण्यो मान्य जायमेरेन हें उपोशण सुरूच उरतलें अशें सेविकांनी सांगलें. फाटले 28 दीस हें आंदोलन सुरू आसा. आतां स दीस जाले उपोशण सुरू आसा, पूण सरकारान कसलीच दखल घेतली ना. ह्या सेविकांची भलायकी इबाडत आशिल्ल्यान सरकारा कडल्यान मात कसलीच मजत मेळिल्ली ना.
तांची भलायकी इबाडत आशिल्ल्यान तांकां ग्लुकोज दिवपाचो यत्न केलो तोवूय तांणी न्हयकारलो. सरकारान आनीक ह्या सेविकांची परिक्षा पळोवची न्हय अशें अॅड. हृदयनाथ शिरोडकार हांणी सांगलें.
जर मुख्यमंत्र्याक ह्या सात आंगणवाडी सेविकांच्यो समस्यो सोडोवंक येना आसत जाल्यार तांणी राजिनामो दिवचो. दरेक फावटी मुख्यमंत्री बायलांक खूबश्यो येवजण्यो तांची सुरक्षा अशी भाशाणां दितात. पूण फाटले म्हयनोभर आंदोलन करपी ह्या बायलां कडेन सरकारान आडनदर केल्या. पूण ह्या सेविकांक आमी न्याय मेळोवन दितले अशें दुर्गादास कामत हांणी सांगलें.
गोवा फॉरवर्ड पक्ष ह्या आंगणवाडी सेविकां बराबर आसा. आमी हे विशीं मुख्यमंत्र्याक निवेदन दितले अशें पक्षाचे फुडारी दुर्गादास कामत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
