भांगरभूंय | प्रतिनिधी
किरण कांदोळकार हांणी दिलो तृणमूलाचो राजिनामो
म्हापशेंः गोंयांतले विधानसभा वेंचणुकेंत तृणमूल काँग्रेसीच्या जाल्ल्या अपमानास्पद हारीक खातीर पक्ष वा थळावे फुडारी न्हय, जाल्यार राजकी रणनितीकार आनी आयपॅकचे सर्वेसर्वा प्रशांत किशोर हेच जापसालदार आसात, असो आरोप किरण कांदोळकार हांणी केला. तृणमूलाचो राजिनामो दिले उपरांत ते पत्रकार परिशदेंत उलयताले.
बुुधवारा सांजे कांदोळकार हांणी म्हापशेंचे उमेदवार नगरसेवक तारक आरोलकार, शिवोलेचे उमेदवार लिअो डायस आनी पर्वरेचे उमेदवार संदीप वझरकार हांचे वांगडा पक्षाच्या मुळाव्या वांगडीपदाचो राजिनामो दिलो. ते उपरांत जोड रितीन म्हापश्यां घेतिल्ले पत्रकार परिशदेंत कांदोळकार उलयताले.
प्रशांत किशोर हे गोंयांत काँग्रेसीक आनी खासा करून ह्या पक्षाच्य अध्यक्षा सोनिया गांधी हांकां ब्लॅकमेल करपा खातीरूच आयिल्ले. आपणाक पक्षांत घेनात म्हूण काँग्रेस पक्षाची गोंयांतली मतांची टक्केवारी उणी करपांत तशेंच भाजपाक सत्तेर हाडपाक प्रशांत किशोर हे येसस्वी थारल्यात.
तृणमूल पक्षान गोंयांतल्या वेंचणुकेची जापसालदारकी आयपॅकाचेर सोंपयिल्ली. प्रशांत किशोर हे वेंचणुकेक आठ दीस उरिल्ले आसतनाच गोंयांतल्यान गेले. जिणेंत दरेक मनीस चूक करता. आमीय मनीसूच आसात. प्रशांत किशोर हांचेर विस्वास दवरलो हीच आमची व्हड चूक, अशेंय कांदोळकार हांणी म्हणलें.
विरोधकांच्या विभाजनाक लागूनच भाजप फक्त 33 टक्के मतांनी सत्तेर आयला. विरोधकांक 67 टक्के मतां मेळ्ळी. विरोधी पक्षांनी एकवट दाखोवंक नाशिल्ल्यान भाजपाक जैत मेळ्ळां, असो दावो कांदोळकार हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
