भांगरभूंय | प्रतिनिधी
तानावडेः कोवीड काळांत कार्यकर्त्यांनी दिल्लें योगदान यादींत उरतलें
भांगरभूंय I प्रतिनिधी
पणजी : भाजप प्रदेशाध्यक्ष म्हूण तीन वर्सांत आपणाक जे येस लाबलां, ताचे पुराय स्रय मुख्यमंत्री डॉ. प्रमोद सावंत आनी पक्षाच्या राज्यभरांतल्या कार्यकर्त्यांक वता. दोन वर्सांच्या कोवीड काळांत कार्यकर्त्यांनी दिल्ल्या फाटबळाक लागून आपूण विवीध कामांनी येसस्वी थारला, अशी कबुली भाजप प्रदेशाध्यक्ष सदानंद शेट तानावडे हांणी बिरेस्तारा आमच्या प्रतिनिधी कडेन उलयतना दिली.
तानावडे हांणी प्रदेशाध्यक्षपदाची तीन वर्सां बिरेस्तारा पुराय केली. ते निमतान तांचे कडेन संवाद सादलो, तेन्ना तांणी तीन वर्सांतल्याे जायत्यो कोडू गोड यादीं सांगल्यो. प्रदेशाध्यक्षपदाची सुत्रां हातांत घेतले सुरवातीची दोन वर्सां कोरोनांत गेली. कोरोना प्रसार आडावपाक केंद्र आनी राज्य सरकारान निर्बंध लागू केल्ल्यान घरांत बसूनच पक्षकार्य करचे पडलें. ह्या काळांत कार्यकर्त्यां वांगडा व्हर्च्युअल पद्दतीन बसका जाताल्यो. केंद्र आनी राज्य सरकारान ह्या काळांत लाेकां खातीर दिल्ल्यो सुविधा नागरिकांक पावोवपाचें व्हड आव्हान आपणा मुखार आशिल्लें. पूण चाळीसूय मतदारसंघांतल्या भाजप कार्यकर्त्यांनी ह्या कामांत आपणाक पुराय सहकार्य केले. प्रदेशाध्यक्ष म्हूण तांकां फक्त उर्बा दिवपाचें काम आपूण केले. पूण भाजप कार्यकर्त्यांनी ह्या काळांत प्रत्यक्षांत मैदानांत देंवन जे काम केलें, ताचो आपणाक अभिमान दिसता, अशें तानावडे हांणी म्हणलें.
सत्ताधारी पक्षाचे सरकार सत्तेर आसता तेन्ना मुख्यमंत्री आनी प्रदेशाध्यक्ष ह्या दोगांकूय हातांत हात घालून काम करप गरजेचें आसता. मुख्यमंत्री डॉ. प्रमोद सावंत हांणी फाटल्या तीन वर्सांत आपणाक हे विशीं सदांच सहकार्य केले. दिल्लींतल्या भाजप फुडाऱ्यांनी आपणाचेर विस्वास दवरलो. ताका लागून तीन वर्सांच्या काळांत जाल्ली विधानसभा, पोटवेंचणुको, जिल्हो पंचायत तशेंच पंचायत वेंचणुकेंत भाजपान घवघवींत येस मेळयलें. ह्या येसाचे खरे स्रय मुख्यमंत्री डॉ. सावंत आनी भाजप कार्यकर्त्यांक वता, अशेंय तांणी सांगलें.
पक्षांतर्गत वेंचणुको जाय मेरेन पद म्हजे कडेनूच
देशभरांतल्यो भाजप प्रदेशाध्यक्षपदांच्यो वेंचणुको जाय मेरेन भाजप प्रदेशाध्यक्षपद अापले कडेनूच उरतले, अशें तानावडे हांणी स्पश्ट केले. येवपी लोकसभा वेंचणूक लढोवपाची तुमची तयारी आसा व्हय, असो प्रस्न विचारल्यार तशी आपली इत्सा ना वा ते विशीं आपूण कोणा कडेन उलोवंक ना. पक्ष जो आदेश दितलो ते प्रमाण पक्षाचे काम करीत रावतलो, अशेंय तांणी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
