भांगरभूंय | प्रतिनिधी
मोपा वचपी उदक आडायतले: तोरशेंच्या लोकांची अधिकार्याक शिटकावणी
पेडणें: सरकारान आमचे जमनींतल्यान आमच्या जमीन धनयाचो ना हरकत दाखलो घेनासतना बेकायदेशीरपणान उदकाचीं पायपां मोपा पंचायत वाठारांत घातल्यांत. आमची हाका कांयच हरकत ना. पूण उदक नासता तेन्ना आमच्या जाग्यावेल्यान वचपी उदकाच्या पायपां वरवीं मोपा वाठाराक उदकाची पुरवण जाता. उण्यांत उणें तीन वरां आमकां नळांतल्यान उदक मेळ्ळें ना जाल्यार आमी मोपा वाठाराक वचपी उदक आडायतले अशी शिटकावणी तोरशें पंचायत वाठारांतल्या शेट्ये वाड्यावेल्या थळाव्यांनी पेडणें उदक विभागाचे अधिकारी संदीप मोरजकार हांची भेट घेवन दिली.
ह्या वेळार उदका विभागाचे अधिकारी संदीप मोरजकार हांणी, तीन वरां तरी ह्या वाठारांतल्या लोकांक उदकाची पुरवण करपाचो दावो केलो.
सध्या पेडणें म्हालांत उदकाची खर समस्या निर्माण जाल्या. अदीं मदीं लायट नासता आनी वता थंय रस्ते खणिल्ल्यान उदकाचीं पायपां फुटून हजारांनी लिटर उदकाचो इबाड जाता. जाल्यार दुसरे वटेन घरांतल्या नळांक एकूय थेंब उदक नासता. पूण नेमान नळाचीं बिलां येतात. ताका लागून नागरीक तिडक उक्तायतना दिसतात.
तोरशें पंचायत वाठारांतल्या शेती वाड्यावेल्या आनी नागझर हांगच्या ग्रामस्थांनी उदका खातीर अधिकार्यांक धारेर धरले. वेळार उदक मेळ्ळें ना जाल्यार रस्त्यार येवन उदकाची पुरवण कित्याक सुरळीत जायना हें पळयतले, अशी शिटकावणी तांणी दिली. तोरशें शेट्येवाड्यावेल्या ग्रामस्थांनी काल उदक विभाग अधिकारी संदीप मोरजकार हांची भेट घेवन, आमचे जमनीचो कसलेच तरेचो ना हरकत दाखलो घेनासतना उदकाचीं पायपा घालून मोपा खातीर उदकाची पुरवण करतात. तरीय आमी कांयच हरकत घेवंक ना. पूण आमच्या वांट्याक येवपी उदक कित्याक दिना, असो प्रस्न ग्रामस्थांनी केलो. तीन वरां तरी आमकां उदक दियात आनी मागीरूच मोपा वाठाराक उदक सोडात. उदकाचें नियोजन नासतना आमचें उदक आमी हेर कडेन वळोवपाक दिवचे ना, अशी शिटकावणी तिडकल्ल्या ग्रामस्थांनी ह्या वेळार अधिकार्याक दिली.
हे विशीं पेडणें भोवजन समाजाचे अध्यक्ष उमेश तळवणेंकार हांणी, उदका प्रकल्पांतल्यान येवपी उदक पेडणेंकारांक मेळना, जाल्यार तें वता तरी खंय? तें उदक जमनींत जिरता काय कितें? अशे प्रस्न तांणी करून, अधिकारी जाग्यार नासल्यार उदकाची पुरवण कशी जातली? सरकारान हे संबंदी विचार करून उदकाची पुरवण सुरळीत करची अशें तांणी सांगलें. तशेंच पेडणें म्हालांतले मांद्रें आमदार जीत आरोलकार आनी पेडणें मतदार संघाचे आमदार प्रवीण आर्लेकार हांणी ह्या प्रस्नाचेर लक्ष घालून मुळाव्या गरजांकडेन लक्ष घालचें आनी ताची फाटपुरवण करची अशी मागणी उमेश तळवणेंकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
