​तिसरे खेपे प्रतिवादी आमदारांनी मागलो वेळ

भांगरभूंय | प्रतिनिधी

अमीत पाटकाराच्या अपात्रताय याचिकेचेर आतां शुक्रारा सुनावणी

पणजी : प्रदेश काँग्रेस अध्यक्ष ​अमीत पाटकार हांणी दाखल केल्ले अपात्रताय याचिकेचेर आतां शुक्रारा 17 मार्चाक सुनावणी जातली. याचिकेंत प्रतिवादी आशिल्ले आमदार दिगंबर कामत आनी मायकल लोबो हांणी तिसरे खेपे वेळ मागून घेतला. पावसाळी अधिवेशना वेळार अमीत पाटकार हांणी सभापती रमेश तवडकार हांचे कडेन दिगंबर कामत आनी मायकल लोबो हांचे आड अपात्रताय याचिका दाखल केल्ली.

जुलय म्हयन्यांत पावसाळी अधिवेशना पयलीं काँग्रेसीचे आमदार फोडपाचे यत्न जाले. काँग्रेसीचे तेन्नाचे प्रभारी दिनेश गुंडू राव हे गोंयात दाखल जाले. काँग्रेस आमदारांची मडगांवां बसका जाली. उपरांत पणजे बसका जाली. अधिवेशना पयलीं काँग्रेस आमदारां मदली फूट टाळपाक येस आयलें. मायकल लोबो आनी दिगंबर कामत हांणी काँग्रेस आमदार फोडपाचे यत्न केले असो आरोप अमीत पाटकार हांणी केलो. तशेंच पक्ष विरोधी कारवायो केल्ल्याचो आरोप करीत तांणी अपात्रतायेची याचिका दाखल केली. आमदार दिगंबर कामत आनी आमदार मायकल लोबो हांचे आड तांणी अपात्रताय याचिका दाखल केल्या.

प्रतिवादी आमदार दर खेपे वेळ मागून घेतात. हाका लागून सुनावणेक उशीर जाता ही गजाल याचिकादाराच्या आदवोगादान सभापतींचे नदरेक हाडून दिली. सभापती रमेश तवडकार हे मंगळारा सुनावणी दवरपाचे आशिल्ले. बेगीन सुनावणी घेवपाची मागणी आमी केली. हाका प्रतिसाद दितना सभापतीन शुक्रारा सुनावणी दवरल्या. याचिकेक 8 म्हयने जाल्ले आसले तरी अजून मेरेन फक्त एकदांच सुनावणी जाली. लेखी बाजू सादर करपाक प्रतिवादी वेळ मागून घेतात.

अमीत पाटकार हे आमदार नात. आमदार सोडून हेर कोणाक अपात्रताय याचिका दाखल करपाचो अधिकार ना अशें मत हाचे पयलीं आमदार दिगंबर कामत हांणी उक्तायिल्लें.

अमीत पाटकार हांची याचिका सोडून सभापती रमेश तवडकार हांचे मुखार आनीक दोन अपात्रताय याचिका आसात. आदले प्रदेश अध्यक्ष गिरीश चोडणकार आनी डॉमनीक नोरोन्हा हांणी याचिका घाल्या. ह्या दोन याचिकां वेली सुनावणी सभापती मुखार सुरू आसा.

दिगंबर कामत, मायकल लोबो, डिलायला लोबो, केदार नायक, राजेश फळदेसाय, संकल्प आमोणकार, अलेक्स सिक्वेरा, रुडाेल्फ फर्नांडीस ह्या आठ आमदारांनी 14 सप्टेंबराक वेगळो गट स्थापन करून भाजपांत प्रवेश केल्लो.