भांगरभूंय | प्रतिनिधी
पुलिसांची उत्कृश्ट कामगिरीः पांचूय दुबावितांक अटक
पणजी : ताळगांवां दीपक कुमार केशरी हाचें अपहरण करून ताका करंझाळे एका फ्लॅटांत कोंडून दवरलो. तशेंच मारपेट करून ताच्या कुटुंबिया कडेन 70 लाख रुपयांची खंडणी मागपाची घडणूक आयतारा घडली. ह्या प्रकरणांत पणजी पुलिसांनी बेगोबेग सुत्रां हालोवन दुबावितांक अटक केली. तशेंच दीपक केशरी हाची सुखरूप सुटका केली.
ह्या प्रकरणांत अंतरीक्ष कुमार सिंग (33, पाटणा – बिहार), अंबर कुमार सिंग (34, पाणा – बिहार), वरद संदीप मुंदादा (27, जालना- महाराष्ट्र) ह्या तिगां दुबावितांक तशेंच मोनिका प्रिया (31, बंगळुरू – कर्नाटक) आनी झियोडाकरीम जानोव्हा (32, उझबेकिस्तान) ह्या दोन बायलां दुबावितांक अटक केल्या.
अटक केल्ल्या दुबावितांक पुलिसांनी पणजे पयलो वर्ग न्यायालयांत उबे केले उपरांत न्यायालयान तांकां दोन दीस पुलीस कोठींत दवरपाचो आदेश दिला.
ताळगांवां दीपक कुमार केशरी हाचे अपहरण केल्ल्याची म्हायती पणजी पुलिसांक मेळिल्ली. ते प्रमाण पणजी पुलीस निरिक्षक निखील पालयेंकार आनी उपनिरिक्षक अल्लाउद्दीन खान आनी हेर पथकान बेगोबेग मोबायल लोकेशन सोदून काडून संबंदींत फ्लॅटाचेर धाड घालून दीपक केशरी हाची आयतारा सकाळीं 11.30 वरांचेर सुटका केली.
ह्या प्रकरणांत दीपक कुमार केशरी हांची रीतसर कागाळ दाखल केल्या. दुबावितांनी आयतार फांतोड्डेर 4 वरांचेर कागाळदाराचें अपहरण केले आनी ताका करंझाळे एका फ्लॅटांत कोंडून दवरलो. तशेंच ताका मारपेट लेगीत केली. ताची सुटका करपाक कुटुंबिया कडेन 70 लाख रुपयांची मागणी केली.
ह्या प्रकरणांत पणजी पुलिसांनी दुबाविता आड भादंसं कलम 342, 364ए, 365 आनी 506(ii) आरडब्ल्यू 34 खाला गुन्यांव दाखल करून चवकशी सुरू केली. पुलिसांनी पांचूय दुबावितांक आयतारा अटक केली.
अशें जालें अपहरण
दीपक कुमार आनी अंतरीक्ष कुमार सिंग हांची एका कॅसिनोंत पोकर गेम खेळटना वळख जाली. कागाळदारान अंतरीक्ष हाका कॅसिनोंत खेळांत मजत करून फायदो करून दिलो. ते उपरांत दुबावीत अंतरीक्ष हांणें कागाळदारा वरवीं पयशांची गुंतवणूक केली. मजगतीं, तांचे पयशे बुडले. ताका लागून पयशे वसूल करपाच्या हेतान दुबावितान ताका करंझाळे आपल्या फ्लॅटांत व्हरून कोंडून दवरलो. आनी ताच्या घरच्यां कडेन संपर्क करून अपहरण जाल्ल्याचे सांगलें. आनी सुटका करपाक 70 लाख रुपयांची मागणी केली. हे विशीं पणजे पुलीस नियंत्रण कक्षाक म्हायती दिले उपरांत पुलिसांनी दुबावितांचो सोद घेवन आयतारा मध्यानरातीं ताची सुटका केली आनी दुबावितांक ताब्यांत घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
