भांगरभूंय | प्रतिनिधी
भूतनाथ आनी रवळनाथाचो मेळ पळोवपाक भाविकांची गर्दी
पेडणें : पेडणेंचे पुनवेक अंदूं रातच्या साडे बारा उपरांत जनसमुदायान व्हड प्रमाणांत गर्दी करून कौल आनी पुनव मनयली. रातच्या अडेज वरां उपरांत श्री भूतनाथ आनी श्री देव रवळनाथ हांचीं सजयल्लीं दोन तरंगां ढोल ताश्यांच्या गजरांत, हजारांनी भाविकांचे हाजेरींत, आदिस्थान देवाचो मांगर हांगच्यान अवसारी कौल दिवपा खातीर गेलो. आदिस्थान देवाचो मांगर मुखेल प्रवेश दारांतल्यान गेल्या उपरांत दोनूय तरंगां भायर सरलीं. उपरांत ते सुवातर परंपरीक तरेन भुतां काडपाचो प्रकार घडलो.
भूतनाथ आनी रवळनाथाचो मेळ
भुतां काडल्या उपरांत श्री देव रवळनाथ आनी भूतनाथ हांचीं अवसारी दादल्यांनी घेतिल्लीं तरंगां फुडें फुडें वतात. ‘हर हर महादेव’ असो व्हडान जागोर चालूच आसता. विशिश्ट पद्धतीन ढोल ताशांचो नाद सुरु आसता. हजारांनी भाविकांच्या मदीं कांय वेळा उपरांत भूतनाथ हांचें तरंग दिल्लो अवसारी दादलो गोल गोल भोंवता आनी नेटान तरंग डोंगर, रानाचे दिकेन धांवता. ताचे फाटल्यानच्यान मानकरी महाजन धांवतात, भूतनाथाची समजूत काडटात. भूतनाथाक डोंगरार देवूळ बांधून दिवपाचें वचन महाजन दितात. एके रातीन आनी एके वातीन हें देवूळ बांदपाचें आसता. पूण तें शक्य नासता. महाजन आनी मानकरी भूतनाथाक ‘होय सायबा’ करून वर्सां धुकलता. पूण कोजागिरी पुनवेक भूतनाथाक आपल्या देवळाची याद जाता आनी तरंग घेवन तो धांवत वता. कुशीकचे वटेन श्री रवळनाथ देवाचें तरंग श्री रवळनाथ मंदिराचे दिकेन वचत आसता. डोंगर माळरानाचे दिकेन गेल्ले भावीक महाजन भूतनाथ देवाची समजूत काढटात. ‘बांध तूं सायबा’ असो शब्द प्रयोग करतात. देवाक दिसता देवूळ महाजन, भक्त बांदतले. पूण ह्या देवळाची पुराय जापसालदारकी भूतनाथ देवाक दिवन सांगतात, ‘बांद तूं सायबा’ देव फसता. ताका दिसता आतां मंदीर भावीक आनी महाजन उबारतले. पूण शब्दांच्या खेळांत नकळत देवाची जापसालदारकी देवाकूच दितात. थंयच्यान भूतनाथाचें तरंग बरेंच नेटान भोंवता. जे सुवातेर श्री देव रवळनाथ देवाचें तरंग आसता थंय भूतनाथाचें तरंग वेगान परत एकदां रवळनाथ तरंगाक भोंवताडो घालता आनी उपरांत दोनूय तरंगांचो मेळ जाता. हें दृश्य पळोवपा सारकें आसता.
परत ते सुवातेर भाविकांक कौल दितात. निमाणें दोनूय तरंगा रवळनाथ देवळांत वतात. थंयसरूय हजारांनी भावीक दर्शन आनी कौल घेतात.
पुलीस निरीक्षक दत्ताराम रावत हांच्या मार्गदर्शना खाला घट्ट पुलीस बंदोबस्त आशिल्लो. खंयच कसलेच तरेचो वायट प्रकार घडूंक ना. अंदूं भाविकांनी व्हडा प्रमाणांत गर्दी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
