भांगरभूंय | प्रतिनिधी
गोवा युनायटेड स्पोर्ट्स अकादमीन काल कळंगूटच्या पोरियट मैदानाचेर आयोजीत केल्ले गोवा टायगर कप 2022 अकील गोंय आंतरगांव फुटबॉल सर्तींत मांद्रेंच्या ड्युन्स स्पोर्ट्स क्लबान साळगांव युनायटेडाक 2-1 अशा गोल फरकांनी हारोवन उत्तर विभागाचे फायनलींत सुवात मेळयली.
पयल्या अर्दांत दोनूय क्लबांनी सादूरतायेन खेळ केलो. ताका लागून ह्या अर्दांत गोल जालो ना. चडसो वगत खेळ हो मिडफिल्डांत जालो.
दुसऱ्या अर्द सुरू जायना मेरेन मॅचींत वेग आयलो. पयलीं गोल करपाचो मान ड्युन्स स्पोर्ट्स क्लबान मेळयलो. अामीर साळगांवकारान 39व्या मिनटाक गोल केलो. ते उपरांत प्रतीक कन्नाईकान गोल करून ड्युन्साची आघाडी 2-0 अशी केली.
अणभवी फॉरवर्ड खेळगडो लतेश मांद्रेंकारान स्पॉट किकीचेर गोल करून साळगांवाचें खातें उगडलें.
ड्युन्साचो अामीराची मॅन ऑफ द मॅच पुरस्कारा खातीर निवड जाली.
बार्देस वॅटरन्स निमाणे फेरयेंत
कांदोळीच्या डॉ. गुस्तांव मोंतेरो मैदानाचेर जाल्ले मॅचींत बार्देस वॅटरन्सान फातोर्डा वॅटरन्साक 3-1 अशा गोल फरकांनी हारोवन फायनलींत सुवात मेळयली.
गॅविन आरावजोन बार्देस वॅटरन्सा उत्कृश्ठ सुरवात करून दिली. ताणें चवथ्या आनी सव्या मिनटाक गोल केले. दोन गोलांनी फाटीं पडिल्ल्या फातोर्डा वॅटरन्सान मॅचींत येवपाचो यत्न केलो. 37व्या मिनटाक विशांत पेडणेंकारान पॅनल्टीचेर गोल केलो.
दुसऱ्या अर्दांत शैलेश मिस्कीनान बार्देस वॅटरन्सा वतीन तिसरो गोल करून आपल्या क्लबाची फायनलींतली सुवात निश्चीत केली. फातोर्डा वॅटरन्साच्या उदय नायकाची मॅन ऑफ द मॅच पुरस्कारा खातीर निवड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
