भांगरभूंय | प्रतिनिधी
बुधवारा कुडीचेर निमाणे संस्कार; समाजीक मळाचेर केल्लो पर्जळीत वावर
भांगरभूंय । प्रतिनिधी
सांगें: सांगें म्हालांतले नामनेचे साहित्यीक, नाट्य कलाकार तशेंच सांगें पालिकेचे आदले नगरसेवक डॉ. रेवणसिद्ध रामनाथ नायक (51) आयतारा 9 ऑक्टोबराक सकाळीं अंतरले. तांचेर बांबोळेच्या गोमॅकाँत उपचार चलताले बुधवारा सकाळीं 11 वरांचेर चिरेबांद सांगेंच्यान तांची निमाणी यात्रा भायर सरतली. सांगेंचे मसुंडेंत तांचे कुडीचेर निमाणे संस्कार जातले.
डॉ. नायक हांच्या फाटल्यान घरकान्न सुनयना, भाव संजय, अजय, शेखर, शैलेश, भावजय समिक्षा, सरिता, दिप्ती आनी पुतणयी श्रावणी नायक असो परिवार आसा.
डॉ. रेवणसिद्ध नायक हे एक अश्टतासी कलाकार, कवी, गीतकार, नाटककार, संगीतकार, गायक, वक्तो, सुत्रनिदेवक, अभिनेतो, दिग्दर्शक अशा कितल्याश्याच भुमिकांनी वावुरतालो. तांणी आपले वांगडा हेर कलाकारांक घडयले.
डॉ. नायक हांचें नक्षत्र पुनवेचें, सृजन फुलां हें दोन कविता झेले तशेंच महारथी कर्ण, प्रतिकार, चंडाळ चौकडी बारा भानगडींत, काणी अस्तुरेची, चला नाटक करुया, आवय तुज्या मोगा खातीर हीं नाटकां तशेंच विनय सिद्दी गौरव ग्रंथ उजवाडाक आयल्यात.
कोंकणी मुक्तताय, पिंपळ पेटला, चैतन्याक मठ ना, आत्मवंचना, शबै शबे भोवजन समाज, जैत तशेंच मराठी संगीत मत्स्यगंधा, अमृत मोहिनी, मोरूची मावशी, शिवकंकण, इथे ओशाळला मृत्यू ह्या नाटकांनी मुखेल भुमिका तशेंच तांचें दिग्दर्शन केलां.
समाजीक मळाचेर तांचो वावर दोळे दिपकावपी आशिल्लो. गोंय राज्य पांवड्याचेर तशेंच थळाव्या संस्थांनी तांणी मन लावन वावर केलो. तांणी विंगड विंगड संस्थांचें प्रतिनिधीत्व केलां. सांगें वाठारांतल्या चडशा संस्थांचें तांणी अध्यक्षपद भुशयलां. पांच वर्सां सांगेंचे नगरसेवक म्हूण काम केलां. राज्य पांवड्याचेर साबार सर्तींनी कवितां खातीर तशेंच गायना खातीर इनामां जोडल्यांत. डॉ. नायक हांकां नेहरू युवा केंद्राचो जिल्हो युवा पुरस्कार, कुडचडें कोंकणी केंद्राचो पुरस्कार, जायते भोवमान, तशेंच हालींच तांकां कोंकणी भाशा मंडळाचो कोंकणी कार्यकर्तो पुरस्कार फावो जाला. तांच्या मरणान सांगें वाठारांत दुख्खाची सया पातळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
