भांगरभूंय | प्रतिनिधी
डॉ. बाबासाहेब आंबेडकर हे हालींच्या काळांत जल्मले एक स्वयंप्रकाशीत नखेत्र. अफाट विद्वत्ता लाबिल्ल्या ह्या मनशाच्या रूपान खरे म्हणल्यार दीनदुबळ्यां खातीर ते एक देवाचेंच रूप आसलें. पूण तांकांय आमी एका वेगळ्या दालनांत बसोवन फकत तांणीं संघर्शांतल्यान मेळोवन दिल्ल्या संधीचो लाब घेत रावले. जणू आयचे घटकेक तरी तशें चित्र दिसता. मानवतावादाक नदरेमुखार दवरून लोकशाहीक खरो अर्थ दिवपी राज्यघटना रचून भारताची अखंडता मजबूत दवरपाच्या हेतान तांणी केल्लो वावर आनी त्याग अज्रंवर आसा.
बाबासाहेब आंबेडकरांची जीण आनी कार्याची तोखणाय करपी अशी शेंकड्यांनी पुस्तकां आयज संवसार भर उजवाडाक येत आसतात. जगांतल्या जायच्या विश्वविद्यालयांनी तांचें साहित्य अभ्यासक्रमांत आस्पावीत केल्लें आसा.
फकत मराठी भाशेचो विचार केल्यार छत्रपती शिवाजी महाराजां बराबर डॉक्टर आंबेडकरां विशीं दिसान दीस नवीं- नवीं पुस्तकां येत आसतात. तांच्या लिखाणाचेरच न्हय तर एका एका पत्राचेर लेगीत पीएचडी मेळयतात. मनीसधर्माक नवी संजीवनी दिवपी अशें तांचे साहित्य अभ्यासकां खातीर एक पर्वणीच कशी. पूण कोंकणीचें तांचे कडेन परकेपण कित्याक? तांचे विशीं म्हणपा सारको एकूय ग्रंथ कोंकणींत कित्याक ना? तथाकथीत न्याय आनी इतिहासकारांचे नजरेंत हो दुजाभाव कित्यात? अशे प्रस्न सदांच उप्रासताले. तेन्ना ताची जाप घेवन एक भिमाभिमानी लेखक मुखार आयलो. जाणे पांच-स वर्सांच्या अथक परिश्रमान एका ग्रंथाची रचना केल्ली. तो आसलो एक निश्ठावान कोंकणी मोगी, आनी गोंयांतल्या आंबेडकरी मांचयांचेर कोंकणी विरोधी वातावरण असूनय तांचेर जायतीं वर्सां जापसालदारकेन कोंकणी कार्यावळी सादर करपी पिळगांवचो, सदा देवगो परवार.
एका काळार ज्या समाजाक जनावरां परस पाश्ट वागणूक मेळटाली, हाडामांसांची मनशां आसूनय कितल्याशाच मागास वर्गांक, आदिवासीक, महिलांक मनीसपणाचो दर्जो नासलो. अशा समाजाक हक्काचें स्थान आनी मनीसरूप मेळोवन दिवपी, आपली जीण त्रासांत उडोवन, असंख्य अपमान-वेदना सहन करून दीन- दुबळ्यांच्या, कामगार- शेतकऱ्यांच्या हक्का खातीर जाणीं आपली जीण झरयली त्या म्हामानव भीमराव आंबेडकारांचें चरित्र कोंकणींत हाडलें ही खरें म्हणजे आमच्या सारक्यांक अभिमानाची गजाल.
बाबासाहेबांचे कार्य आनी जिणेसंघर्श एका 320 पानांच्या पुस्तकांत मांडप तशें शक्य ना. तरीय सदा परवार हांणीं तांचो जिणेपट वेवस्थीत चित्रावपाचो यत्न केला.
दिन दलितांचे म्हान कैवारी, चिड्डिल्ल्या माड्डिल्ल्यांचे उद्धारक, पत्रकार, विविध क्षेत्रांतले तज्ञ, भारतरत्न भीमराव आंबेडकर हांचे जिणेचेर आधारीत सदा परवारान रचिल्ल्या “बोधिसत्व: डॉ. बाबासाहेब आंबेडकर” ह्या ग्रंथाचें हालींच आयडियल हायस्कूल सभाघर, पिळगांव हांगा मानेस्तांचे हस्तुकी लोकार्पण जालें. गोवा कोंकणी अकादेमीच्या पालवान हें पुस्तक आदिमंत्र कलारंग, मोलें हांणीं प्रकाशीत केलां.
बाबासाहेब आंबेडकरांचे विचार आनी तांच्या जिविताचेर उजवाड घालपी तांचे चरित्र पयलेच फावट कोंकणींत आयलां, समेस्त कोंकणी मोगी आनी भिमप्रेमींनी मुजरत हें पुस्तक वाच्चें.
रामनाथ गावडे
9420979010
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
