भांगरभूंय | प्रतिनिधी
फातोड्डेंच्या डॉन बॉस्को ऑरेटरीन गोवा टायगर कप 2022 अखील गोंय आंतरगांव फुटबॉल सर्तींतले एके मॅचींत सीएसी कांसावलीक 5-1 अशा व्हडा फरकान हारयलो.
गोवा युनायटेड स्पोर्ट्स अकादमीन आयोजीत केल्ले सर्तींतली ही मॅच नावेलीच्या रोझरी मैदानाचेर जाली. मॅन ऑफ द मॅच पुरस्कार जैतिवंत क्लेन्सियो पिंटोन 18व्या मिनटाक डॉन बॉस्कोचें खातें उगडलें. दुसऱ्या अर्दांत क्लिफर्डान 57व्या मिनटाक आनी अॅश्लीन 58व्या मिनटाक गोल केले. कांसावली वतीन एल्विनोन एक गोल केलो. पूण, डॉन बॉस्को वतीन क्लेन्सियोन 64व्या मिनटाक आनी अॅश्लीन 66व्या मिनटाक गोल केलो.
नेरुलान सेंट अॅंथनीक हारयलो
अॅन्सन परेरान केल्ल्या एकोड्या गोला नेटार युनायटेड क्लब नेरुलान शिवोली मार्नाच्या सेंट अॅंथनीक 1-0 अशा फरकान हारयलो. मॅच कळंगूटच्या पोरीयट मैदानाचेर जाली.
दोनूय क्लबांनी पयल्या अर्दांत जबरदस्त खेळ केलो. पूण, दुसऱ्या अर्दांत अॅन्सनान गोल करून नेरुलाचें खातें उगडलें. नेरुलान ही आघाडी अखेर मेरेन राखून निसट्टें जैत जोडलें.
केपें वॅटरन्स जिखलो
केपे वॅटरन्सान कांदोळीच्या डॉ. गुस्तांव मोंतेरो मैदानाचेर जाल्ले मॅचींत वार्का वॅटरन्साक 5-3 असो हारयलो. पुर्ण वेळाच्या खेळांत दोनूय क्लब 1-1 अशे बरोबरींत आशिल्ले.
सानील फर्नांडीसान 14व्या मिनटाक वार्काक आघाडी मेळोवन दिली. जाल्यार नॅल्सन गोम्सान 20व्या मिनटाक केपें वॅटरन्साक बरोबरीचेर हाडलो. टायब्रेकरांत केपें वॅटरन्सा वतीन रेमंड डिसोझा, बाबाझिनो डायस, मार्कस गोम्स आनी मारियो मिरांडा हांणी गोल केले, जाल्यार वार्का वतीन जेम्स द कोस्ता आनी अपोलो परेरा हांकां गोल करपाक येस आयलें. वार्काच्या नारायण मिस्त्रीची मॅन ऑफ द मॅच पुरस्कारा खातीर निवड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
