टीम इंडियाक डाव आनी 132 धांवड्यांनी जैत

भांगरभूंय | प्रतिनिधी

टीम इंडियान बॉर्डर-गावस्कर ट्रॉफीची पयली टॅस्ट अडीच दिसांनी एक डाव आनी 132 धांवड्यांनी जिखली. ह्या जैता सयत भारतान चार टॅस्टींचे माळेंत 1-0 अशी आघाडी घेतली, माळेंतली दुसरी मॅच 17 फेब्रुवारीक दिल्ली जातली.

नागपूराच्या जामथा क्रिकेट स्टेडियमाचेर भारताच्या बॉलरांनी दुसऱ्या डावांत ऑस्ट्रेलिया पंगडाक 91 धांवड्यांचेर ऑलआवट केलो. स्टिवन स्मिथान सगल्यांत चड 24 धांवड्यो केल्यो. मार्नस लाबशेनान 17 धांवड्यांचें योगदान दिलें. जाल्यार डॅव्हीड वॉर्नर आनी एलेक्स कॅरी हांणी दरेकी 10 धांवड्यो केल्यो.

भारताचो ऑफ स्पिनर आर आश्विनान 5 विकेटी घेतल्यो. मोहम्मद शमी आनी रवींद्र जडेजा हांकां दरेकी दोन विकेटी फावो जाल्यो. अक्षर पटेलाक एक विकेट मेळ्ळी.

ते पयलीं, भारताचो पयलो डाव 400चेर सोंपलो. अशे तरेन येजमान पंगडाक 223 धांवड्यांची आघाडी मेळिल्ली. मुखेली रोहित शर्मान 120 धांवड्यांची खेळी केली. जडेजा (70) आनी पटेल हांणी आठवे विकेटी खातीर 211 बॉलांनी 88 धांवड्यांची भागिदारी केली. ते उपरांत मोहम्मद शमीन ऑस्ट्रेलियेच्या बॉलरांची बॉलींग फोडून काडली आनी णववे विकेटी खातीर पटेला सयत 52 धांवड्यांची म्हत्वाची भागिदारी केली. शमीन 47 बॉलांनी 2 चवके आनी तीन सक्यांचे मजतीन 37 धांवड्यो केल्यो. अक्षर पटेलान 174 बॉलांनी 10 चवके आनी एका सक्याचे मजतीन 84 धांवड्यो केल्यो. रवींद्र जडेजान 70 आनी मोहम्मद शमीन 37 धांवड्यांची उपेगी खेळी केली.

ऑस्ट्रेलिये वतीन पदार्पण करपी टॉड मर्फीन सात विकेटी घेतल्यो. ऑस्ट्रेलियेचो पयलो डाव 177चेर सोंपिल्लो.

दुसऱ्या डावांत लेगीत ऑस्ट्रेलियेची घसरगुंडी चालूच उरली. आर आश्विनान दुसरेच ओव्हरींत उस्मान ख्वाजाक बाद केलो. ते उपरांत जडेजान टॅस्टींतलो पयल्या क्रमांकाचो बॅट्समन मार्नस लाबशेनाक एलबीडब्ल्यू बाद केलो. आश्विन आनी वॉर्नर हांचे मदीं चुरस पळोवपाक मेळ्ळी. पूण, परतून एकदा आश्विनान येस मेळयलें.

बॉर्डर-गावस्कर ट्रॉफींत सगल्यांत चड विकेटी घेवपाचे बॉलींग वळेरेंत आश्विन (97) दुसरे सुवातेर पावलो. आश्विनान 31 खेपे डावांत पांच विकेटी घेवपाचो पराक्रम केलो. ताणें आदलो स्पिनर अनील कुंबळेच्या भारतीय विक्रमा कडेन बरोबरी केली. जडेजान ऑस्ट्रेलियेक सातवो धपको दितना मुखेली पॅट कमिन्साक बाद केलो. विकेटकीपर के एस भरतान उत्कृश्ट कॅच धरली.

आश्विन टॅस्ट क्रिकेटींत 100 विकेटी ह्यो एलबीडब्ल्यू म्हणून घेतल्यो. पयले सुवातेर अनील कुंबळे (156) आसा. दुसरे सुवातेर श्रीलंकेचो मुथय्या मुरलीधरन (150), तिसरे सुवातेर ऑस्ट्रेलियेचो आदलो लेग स्पिनर सर्गेस्त शेन वॉर्न (138) आनी चवथे सुवातेर श्रीलंकेचो आदलो स्पिनर रंगना हेराथ (108) आसा.

शमीन नॅथन लियोनाक (8) बाद करून ऑस्ट्रेलियेक णववो धपको दिलो. स्मिथ दुसरे वटेन रावन विकेट पडटा त्यो पळयत उरलो. जडेजान स्मिथाक बाद केलो आनी भारतान खोश मनोवपाक सुरवात केली. पूण, तो नो बॉल आशिल्लो. अखेरेक शमीन स्मिथाक बाद केलो आनी ऑस्ट्रेलियेचो दुसरो डाव 91चेर सोंपलो.