भांगरभूंय | प्रतिनिधी
भांगरभूंय I प्रतिनिधी
पणजी : म्हापशेंचे आमदार ज्योशुआ डिसोझा हांची 24 आड 12 मतांनी उपसभापतीपदार निवड जाली. काँग्रेसीची डिलायला लोबो हांकां तांणी हारयल्या. आरजी तशेंच आपाचे आमदार तटस्थ रावले. तांणी कोणाकूच तेंको दिवंक ना.
उपसभापतीपदा खातीर ज्योशुआ डिसोझा हांचें नांव सुचोवपी गणेश गांवकार आनी प्रेमेंद शेट हांचे वेगळेवेगळे प्रस्ताव आशिल्ले. गणेश गांवकार हांच्या प्रस्तावाक कृष्णा साळकार जाल्यार प्रेमेंद शेट हांच्या प्रस्तावाक गणेश गांवकार हांणी तेंको दिलो. काँग्रेसीची डिलायला लोबो हांच्या नांवाचो प्रस्ताव आमदार कार्लोस फेरेरा हांणी सभाघरांत मांडलो. विजय सरदेसाय हांणी थारावाक तेंको दिलो.
सभापती रमेश तवडकार हांणी हे थाराव मतदानाक घातले. उपसभापतीपदा खातीर ज्योशुआ डिसोझा हांकां तेंकाे दिवपी 24 मतां पडलीं जाल्यार 12 मतां विरोधांत पडलीं.
मगो तशेंच तीन अपक्ष आमदारांनी ज्योशुआ डिसोझा हांकां तेंको दिलो. गोवा फॉरवर्डाचे आमदार विजय सरदेसाय हांणी ज्योशुआ डिसोझा हांच्या विरोधांत मतदान केलें. आपाचे वेंझी व्हिएगस, क्रूज सिल्वा तशेंच रिव्होल्युशनरी गोवन्साचे विरेश बोरकार तटस्थ रावले. तांणी मतदानांत वांटो घेवंक ना. मतविभागणेन मतदान जालें.
उपसभापतीपदार निवड जाले उपरांत सभाघरांत ज्योशुआ डिसोझा हांकां परबीं भेटोवपी भाशणां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
