भांगरभूंय | प्रतिनिधी
साहित्य अकादेमी पुरस्कार जाहीर, मराठी बालसाहित्य पुरस्कार संगीता बर्वेक
भांगरभूंय । खबरां मेज
पणजी : ज्येश्ठ लेखिका, निर्माती, दिग्दर्शक ज्योती कुंकळकार हांच्या ‘मयुरी’ हे कोंकणी कादंबरीक साहित्य अकादेमीचो बाल साहित्य पुरस्कार फावो जाला. जाल्यार युवा साहित्य पुरस्कार ‘ताळो’ (आवाज) ह्या फादर मायरन जेसन बार्रेटो हांच्या निबंदांच्या पुस्तकाक मेळ्ळा. अकादेमीचे बाल आनी युवा साहित्य पुरस्कार बुधवारा जाहीर जाले. मराठींतलो बालसाहित्य पुरस्कार लेखिका डाॅ. संगीता बर्वे हांचे ‘पियूची वही’ कादंबरीक मेळ्ळो.
अकादेमीचे अध्यक्ष डाॅ. चंद्रशेखर कंबार हांचे अध्यक्षते खाला कार्यकारी मंडळाचे बसके उपरांत हे पुरस्कार जाहीर जाले. हातूंत णव कथा झेले, सात कविता झेले, पांच कादंबरी आनी एक निबंध संग्रह आसा. पन्नास हजार रुपया आनी ताम्रपट अशें पुरस्कारांचें स्वरुप आसा. अंदूं 14 नोव्हेंबराक बालदिनाक साहित्य अकादेमीच्या विशेश कार्यावळींत हे पुरस्कार भेटयतले. देशांतल्या 22 प्रादेशीक भाशां खातीर बाल साहित्य पुरस्कार तर 23 जाणांक युवा साहित्य पुरस्कार जाहीर जाल्यात.
इंग्लीश बालसाहित्याचो पुरस्कार अर्शिला सत्तार (महाभारत), शमा शर्मा (शमा शर्मा की चुंनिदा कहानीयाँ- हिंदी), जफर कमाली (होंसलों की उडान- उर्दू) हांकां मेळ्ळो. संस्कृताचो युवा साहित्य पुरस्कार श्रृती कानिटकाराक (श्रीमती चरित्रम- कविता झेलो) मेळ्ळो.
ज्योती कुंकळकार
ज्योती कुंकळकार हांची हाचे पयलीं ‘पाषाणकळी’, ‘ख्यास्त’ अशा दोन कादंबऱ्या सयत वट्ट 33 पुस्तकां प्रकाशीत जाल्यात. त्यो गोंयची अश्टताशी व्यक्ती. साहित्या वांगडाच तांणी सिनेमा निर्माण केल्यात. सुत्रसंचालन, दिग्दर्शन, अभिनय, निर्मिती मळाचेरुय तांणी नांव जोडलां. तांकां गोंय सरकाराचो यशोदामिनी, तशेंच फिल्म निर्मिती पुरस्कार, अभिनया खातीर राज्य पुरस्कार फावो जाल्यात. तांणी सात मराठी पुस्तकांय बरयल्यांत.
फादर मायरन जेसन बार्रेटो
फादर मायरन जेसन बार्रेटो हे सादोळशें- काणकोणचे. 1988 त जल्म. धर्मगुरू म्हूण काम करतना तांणी पुस्तकां बरयल्यांत. तांकां गोंय सरकाराचो युवा सृजन पुरस्कार फावो जाला. कोंकणी भाशा मंडळाचो साहित्य पुरस्कार आनी दाल्गाद युवा पुरस्कार (2018) तांकां मेळ्ळा. पर्जळींत पावलां, भरवंशाचें किरण अशीं 8 पुस्तकां तांणी बरयल्यांत. तांणी साबार गांवांनी धर्मगुरू म्हूण काम केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
