भांगरभूंय | प्रतिनिधी
धारगळे भूंयखंड विक्री प्रकरण, गुन्यांव रद्द करपाक न्हयकार
भांगरभूंय I प्रतिनिधी
पणजीः धारगळे जमीन वेव्हार प्रकरणांत मांद्रेंचे आमदार जीत आरालेकार हांचे आड दाखल जाल्लो गुन्यांव रद्द करपाक गोंय खंडपिठान न्हयकार दिला. विशेश तपास पंगडान (एसआयटी) सादर केल्ल्या अहवाला प्रमाण, जमनीचे रुपांतर करिनासतना भूयखंड विक्री केल्यात. तशेंच एसआयटीच्या तपास चवकशेंत हस्तक्षेप करप योग्य नाशिल्ल्याचे निरिक्षण गोंय खंडपिठान नोंदयलां. हे विशींचो निवाडो न्या. महेश सोनक आनी न्या. भारत पी. देशपांडे हांणी जारी केला.
ह्या प्रकरणांत संध्या बांदेकार हांणी 26 ऑक्टोबर 2020 दिसा पेडणें पुलिशेंत कागाळ दाखल केल्ली. कागाळे प्रमाण धारगळे सर्वे क्रमांक 481/0त जमनीचे दोन धनी आसात. हातूंतल्या म्हापशेंच्या विद्या नाटेकार आनी संजय नाटेकार ह्या धनयांची पॉवर ऑफ अॅटर्नी जीत अारोलकार हांचे कडेन, जाल्यार रवळू खलप आनी प्रकाश खलप हांची पॉवर ऑफ अॅटर्नी संध्या बांदेकार हांचे कडेन आसा.
जीत आरोलकार हांणी हे जमनीची विभागणी करिनासतना फटीचीं कागदपत्रां सादर करून जमनीचें प्लॉट केले आनी विक्री करून 25 ते 30 कोटी रुपयांची फटवणूक केल्ल्याचे कागाळेंत नमूद केल्ले. ह्या प्रकरणांत पेडणें पुलिसांनी 26 ऑक्टोबर 2020 दिसा जीत आरोलकार हांचे आड गुन्यांव दाखल केल्लो. उपरांत हे प्रकरण 29 ऑक्टोबर 2020 दिसा अर्थीक गुन्यांव अन्वेशण विभागा कडेन वर्ग केल्ले.
मजगतीं, जीत आरोलकार हांणी उत्तर गोंय आनी सत्र न्यायालयांत अटकपूर्व जामिना खातीर अर्ज केल्लो. न्यायालयान 10 फेब्रुवारी 2021 दिसा 25 हजार रुपया आनी हेर अटींचेर अटकपूर्व जामीन मंजूर केल्लो. हे प्रकरण दिवाणी स्वरूपाचें आसून वेंचणुकेचे फाटभुंयेर आपल्या विरोधांत गुन्यांव दाखल केल्ल्याचो दावो करून आमदार जीत आरोलकार हांणी गुन्यांव रद्द करपाक गोंय खंडपिठांत याचिका दाखल केल्ली. हातूंत तांणी राज्य सरकार, पेडणें पुलीस गुन्यांव विभाग आनी रवळू वैकुंठ खलप तशेंच मूळ कागाळदार संध्या बांदेकार हांकां प्रतिवादी केल्या.
राज्यांत जमीन हडप प्रकरणां उक्ताडार येत आसात. हाची दखल घेवन सरकारान चवकशी करपाक विशेश तपास पंगड (एसआयटी) स्थापन केले उपरांत हें प्रकरण एसआयटी कडेन वर्ग केलां. हाची दखल घेवन खंडपिठान एसआयटीक खंडपिठांत अहवाल सादर करपाक सांगलां.
तशेंच मूळ कागाळदाराचे वकील अरूण ब्राझ डिसा हांणीय वयलो मुद्दो उखलून युक्तीवाद करून गुन्यांव रद्द करचो न्हय, अशी मागणी केल्या. हाची दखल घेवन खंडपिठान वयले निरिक्षण नोंदयलां.
तशेंच ह्या प्रकरणांत एसआयटीन चवकशी पुराय केले उपरांत आरोपपत्र दाखल केले. तातूंत आरोप सिद्ध करपा इतले पुरावे नासल्यार याचिकादार जीत आरोलकार हाका दोशमुक्त करपाची संद मेळटली, अशें निरिक्षणूय खंडपिठान नोंदोवन गुन्यांव रद्द करपाक न्हयकार दिलो.
जमनीचें रुपांतर करिनासतना भूंयखंडाची विक्री
एसआयटीन दाखल केल्ल्या अहवाला प्रमाण धारगळची सर्वे क्रमांक 481/0 तली 1,18,845 चौ.मि. जमनींतली 500 चौ.मि. जमीन पडीक आसा. अशें आसतना वयल्या जमनीचें रुपांतर करिनासतना ताची भूंयखंड तयार करून विक्री केल्या. तशेंच 2013 ते 2018 ह्या काळांत कसल्याच प्रकाराची विभागणी वा जमीन रुपांतर करिनासतना सुमार 200 भूंयखंड विकसीत करून विक्री केल्ल्याचो अहवाल एसआयटीन खंडपिठांत सादर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
