भांगरभूंय | प्रतिनिधी
रेईश मागूश, दवर्लें भाजप, कुठ्ठाळेंत अपक्षाचें जैत
रेईश मागुश – संदीप बांदोडकार (भाजप) – 5,345 मतां
कुठ्ठाळी – मर्सिआना वाझ (अपक्ष) – 4,453 मतां
दवर्ली – परेश नायक (भाजप) – 4,080 मतां
भांगरभूंय I प्रतिनिधी
पणजी : जिल्हो पंचायत पोटवेंचणुकेंत तीन सुवातांतल्यान सत्ताधारी भाजपाक दोन सुवांतांचेर जाल्यार एके सुवातेर अपक्ष उमेदवार जैतिवंत जाला. ताका भाजपाचो तेंको आशिल्लो. पोटवेंचणुकेत भाजपा उमेदवारांक जैत मेळोवन दिल्ले खातीर मुख्यमंत्री डॉ. प्रमोद सावंत हांणी गोंयच्या लोकांचे उपकार मानल्यात. प्रधानमंत्री नरेंद्र मोदी हांचे फुडारपणा खाला गोंय भाजपा सरकार लोकांच्यो अपेक्षा पुराय करपाक बांदील आसा, अशें मुख्यमंत्री डॉ. प्रमोद सावंत हांणी म्हणलें. भाजपाचे राष्ट्रीय अध्यक्ष जे. पी. नड्डा हांणी लेगीत जैतां खातीर गोंयच्या लोकांक परबीं भेटयल्या.
दवर्ली जिल्हो पंचायत मतदारसंघांत भाजपाचे परेश नायक, कुठ्ठाळी मतदारसंघांत अपक्ष मर्सिआना वाझ जाल्यार रेईश मागुश मतदारसंघांत भाजपाचे संदीप बांदोडकार जैतिवंत जाल्यात. कुठ्ठाळी मतदारसंघांत भाजपान अपक्ष मर्सिआना वाझ हांकां तेंको दिल्लो. हाका लागून सत्ताधारी भाजपाक जिल्हो पंचायत पोटवेंचणुकेंत 100 टक्के येस मेळ्ळां.
दवर्ली, कुठ्ठाळी आनी रेईश मागुश मतदारसंघाचे जिल्हो पंचायत वांगडी आमदार जाल्ल्यान ह्या मतदारसंघांत पोटवेंचणूक जाली. आयतारा 16 तारखेक मतदान जाले उपरांत मंगळारा मतमेजणी जाली. जिल्हो पंचायत वेंचणुकेंत मतदारांचो सामको उणो प्रतिसाद मेळिल्ल्यान फक्त 47 टक्के मतदान जालें. दवर्ली मतदारसंघांत भाजपाचे परेश नायक हांकां 4,080 जाल्यार आम आदमी पक्षाचे (आप) सिद्धेश भगत हांकां 3,374 मतां मेळ्ळीं. परेश नायक 706 मतांनी जैतिवंत जाले. रेईश मागूश मतदारसंघांत भाजपाचे संदीप बांदोडकार हांकां 5,345 मतां पडली. तांचे खालोखाल अपक्ष साईनाथ कोरगांवकार हांकां 1,101 मतां मेळ्ळीं. कुठ्ठाळी मतदारसंघांत अपक्ष मर्सिआना वाझ ह्यो 4,453 मतां मेळोवन जैतिवंत जाल्यो.
संघटणा घटमूट करपाचो धडो : काँग्रेस
जिल्हो पंचायत वेंचणुकेचो निकाल निरशेवणी दिवपी आसलो तरी संघटणा घटमूट करपाचो धडो काँग्रेसीक मेळ्ळा, अशें पक्षान म्हणलां. प्रदेश अध्यक्ष अमीत पाटकार आनी विरोधी पक्ष फुडारी युरी आलेमांव हांणी एकठांय पत्रक जारी केलां. ह्या निकालाचे विश्लेशण करपा सयत मतदारसंघांत वचून आमी संघटणेची उबारणी करतले. जिल्हो पंचायत पोटवेंचणुकां पयलीं आठ आमदारांनी भाजपांत प्रवेश केलो. हाका लागून संघटणेचेर परिणाम जाला, अशें काँग्रेसीन म्हणलें.
हो मतदारांनी दाखयिल्लो विस्वास : मुख्यमंत्री
जिल्हो पंचायत पोटवेंचणुकेंत तिनूय मतदारसंघांत जैत मेळोवन दिवपा खातीर मुख्यमंत्री डॉ. प्रमोद सावंत हांणी गोंयकारांचे उपकार मानल्या. प्रधानमंत्री नरेंद्र मोदी हांचे फुडारपणा खाला गोयां सयत देशाची उदरगत जायत आसा. मतदारांनी पोटवेंचणुके निमतान परतून भाजपाचेर विस्वास दाखयला, अशें मुख्यमंत्री डॉ. प्रमोद सावंत हांणी म्हणलें.
लोकसभेच्यो दोनूय सुवातो भाजप जिखतलो : तानावडे
दिसानदीस भाजपाची शक्त वाडत आसा. लोकसभेच्या दोनूय सुवातांचेर भाजपाकूच जैत मेळटलें. विरोधकांनी एकठांय येवन वेंचणूक लडयली तरीय भाजपाक ते हारोवंक शकनात, अशें प्रदेश भाजप अध्यक्ष सदानंद शेट तानावडे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
