भांगरभूंय | प्रतिनिधी
वास्को: जिल्हो पंचायत निधींतल्यान दाबोळी रेल्वे स्टेशना मुखा वयल्या मैदानाच्या विकास कामाचो शुभारंभ जिल्हो पंचायत वांगडी अनिता थोरात हांचे हाजिरेंत पंचायत मंत्री मॉवीन गुदिन्हो हांचे हस्तुकीं केलो.
ह्या वेळार बोगमाळोचे सरपंच लॉरेना डिकुन्हा, उपसरपंच संकल्प महाले, पंच लक्ष्मण कवळेंकार, चिखलीचे उपसरपंच कमला प्रसाद यादव, नगरसेवक विनोद किनळेकार, पंच शिवाजी कुराडे, आदले नगराध्यक्ष क्रितेश गांवकार, आदले नगराध्यक्ष नंदादीप रावत आनी हेर मानेस्त हाजीर आशिल्ले. ह्या मैदाना खातीर जिल्हो पंचायत निधीचो वापर करतले. पयल्या टप्प्यांत 30 लाख रुपया खर्च करतले अशें गुदिन्हो हांणी सांगलें.
ही जमीन इक्वीन रिबेरो हांच्या मालकीची आसा. पूण तांणी ही जमीन लोकांक फायदो जावचो हे खातीर मैदान विकसीत करपा खातीर दिल्या. ह्या मैदानाच्या भोंवतणी चलपा खातीर एक मार्ग दवरतले अशें गुदिन्हो हांणी स्पश्ट केलें.
अनिता थोरात हांणी ह्या मैदाना खातीर सगलो निधी वापरतले. तशेंच मैदानाची उदरगत करपाचे काम पांवड्या पांवड्यान सुरू करतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
