भांगरभूंय | प्रतिनिधी
पणजी: पर्वरेचे पत्रकार कॉलनींत शेनवारा सांजेवेळार वीरेश बाळीकाई ह्या कामगाराक एका जर्मन शेफर्ड जातीचो पोशिल्ल्या सुणो तीन कडेन चाबलो. सुण्याच्या धनया कडेन अशे दोन सुणे आसात. तांकां भोंवपाक व्हरतना एका सुण्यावेलें नियंत्रण सुटलें आनी ताणें विरेशाचेर हल्लो केलो.
उपरांत विरेशान गोमॅकोंत वचून इंजेक्शन घेतलें. दिसवड्याचेर जगपी ह्या कामगाराक आतां आनीक तीन दीस इजेक्शन घेवपा खातीर हॉस्पिटलांत वच्चें पडटलें. ही घडणूक गंभीर आशिल्ल्यान सगल्यांनी ताका पुलिशेंत कागाळ करपाचो सल्लो दिलो. तरी तो ओगीच रावलो.
लोकांनी अशीं हिंस्र जातीचीं सुणीं पाळचीं न्हय, भोंवडावचीं न्हय म्हणून फाटले कांय म्हयने व्हाॅट्सअॅप ग्रुपाचेर चर्चा चलताली. ह्या सुण्यांक भियेवन आपूण त्या रस्त्यान वचना, अशेंय कांय जाणांनी व्हाॅट्सअॅप ग्रुपाचेर म्हणिल्लें. हें जर सुशिक्षीत मनशाचे बाबतींत घडिल्लें जाल्यार पुलीस कागाळ जावपाची, अशेय कमेंट ग्रुपाचेर आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
