भांगरभूंय | प्रतिनिधी
गिरीश चोडणकाराची मुख्यमंत्र्या कडेन मागणी
पणजी: जमीन बळाकवप प्रकरणांत घुस्पल्ल्या मंत्र्याक मंत्रीमंडळांतल्यान काडून उडोवचो अशी मागणी काँग्रेसीचे आदले प्रदेशाध्यक्ष गिरीश चोडणकार हांणी काल (आयतरा) मुख्यमंत्र्या कडेन केली. मुख्यमंत्र्यान कायदो मोडप्याक आपल्या मंत्रीमंडळांत थारो दिवचो न्हय अशेंय तांणी म्हणलें.
चोडणकार हांणी 45 दिसां पयलीं ह्या विशया कडेन समाज माध्यमा वयल्यान सरकाराचें लक्ष ओडिल्लें आनी तांणी ह्या प्रकरणांत घुस्पल्ल्या मंत्र्याक मुख्यमंत्र्यान ताकतिकेन काडून उडोवचो अशी मागणी केल्ली.
मुख्यमंत्री डॉ. प्रमोद सावंत हांणी त्या मंत्र्याचो जमीन बळकावप प्रकरणांत हात आशिल्ल्याची म्हायती आसून लेगीत ताका मंत्रीमंडळांतल्यान काडून उडयलो ना वा जाहीरपणान खंयचोच मंत्री ह्या प्रकरणांत गुथिल्लो ना अशें स्पश्ट केल्लें ना. मुख्यमंत्र्यान आपणायिल्लें मौनव्रत खूब कितें सांगून वता आनी हाकाच लागून मंत्री ह्या प्रकरणांत गुथिल्ल्याचे म्हायतीक पुश्टी मेळटा अशें चोडणकारान म्हणलें.
चोडणकार हांणी 25 जून 2022 दिसा भूंय बळाकवप प्रकरणांत घुस्पल्ल्या मंत्र्याक मंत्रीमंडळांतल्यान काडून उडोवचो, हाका लागून ह्या प्रकरणाची चौकशी निपक्षपातीन करूंक मेळटली आनी जांच्यो जमनी बळकायल्यात तांचे मदीं कागाळ करपाक आत्मविस्वास निर्माण जातलो अशें नमूद केल्लें.
मुख्यमंत्र्यान त्या मंत्र्याक मंत्रीमंडळांतल्यान काडून उडयलो ना जाल्यार ह्या प्रकरणांतलो मंत्र्याचो सहभाग आशिल्लीं सगलीं कागदपत्रां भौशीक करूं अशी शिटकावणी चोडणकारान दिली.
फुडल्या धा दिसां भितर मुख्यमंत्र्यान त्या मंत्र्याक मंत्रीमंडळांतल्यान काडून उडोवचो वा जहीरपणान मंत्री भूंय बळाकावप प्रकरणांत गुथिल्लो ना अशें सांगचें अशें आव्हान चोडणकारान दिलां. अशें करतना तांणी हाचे पयलीं लिंगीक आगळीकीच्या आरोपा वयल्यान तेन्नाच्या मंत्र्या कडल्यान कसो राजिनामो घेवचो पडलो हाची याद करून दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
