भांगरभूंय | प्रतिनिधी
जाहीर सभेंत भाशण करतना हल्लेखोरान मारलो फार
टोकयोः जपानाचे आदले प्रधानमंत्री शिंजो आबे (67) हांचेर जाल्ल्या हल्ल्यांत तांकां मरण आयलें. सकाळीं आबे एका जाहीर सभेंत भाशण करतना तांचेर एका अनवळखी हल्लेखोरान फार मारलो. ह्या हल्ल्यांत जखमी जाल्ल्या आबे हांकां बेगोबेग हॉस्पिटलांत दाखल करून तांचेर उपचार सुरू केल्ले.पूण चड रक्तस्त्राव जाल्ल्यान उपचारा मजगतीं, तांकां मरण आयलें.
मेळिल्ले म्हायती प्रमाण अस्तंत जपानांतल्या नारा शारांत एका वेंचणुकेचे फाटभुंयेर आदले प्रधानमंत्री शिंजो अाबे हांची सभा आयोजीत केल्ली. सभेंत तांचे भाशण सुरू आसतनाच तांचेर अनवळखी हल्लेखोरान दोन गुळयो झाडल्यो. घडणूक थळा वयल्यान पुलिसांनी हल्लेखोराक ताब्यांत घेतला.
भारतांत आयज राष्ट्रीय दुखवटो
जपानाचे आदले प्रधानमंत्री शिंजो आबे हांकांं हल्ल्यांत मरण आयिल्ल्याचे फाटभुंयेर भारत सरकारान आयज 9 जुलयाक एका दिसाचो राष्ट्रीय दुखवटो जाहीर केला. 2021त भारत सरकारान शिंजो आबे हांकां पद्मविभूशण पुरस्कारान भोवमानीत केल्ले. आबे हांच्या मरणाची बातमी कळ्ळे उपरांत प्रधानमंत्री नरेंद्र मोदी हांणी दुख्ख उक्तावन एका दिसाच्या राष्ट्रीय दुखवट्याची घोशणा केल्या
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
