भांगरभूंय | प्रतिनिधी
प्रवीण आर्लेकारः कोरगांवां शिवजयंती कार्यावळ उमेदीन
भांगरभूंय । प्रतिनिधी
पेडणें: छत्रपती शिवाजी महाराज हांणी सगळ्या जाती धर्मांच्या लोकांक एकठांय हाडून स्वराज्याची स्थापना केली. तांचे आचार आनी विचार आयज लोकांनी आपणावप गरजेचें आसा. छत्रपती शिवाजी महाराजान कसलोच जातीभेद करूंक ना. सगळ्यांक वांगडा घेवन राज्यकारभार केलो. तेचवरी सगळ्यांनी एकवटींत रावून काम करपाक जाय. पेडणेंची उदरगत करतना सगळ्यांनी एकवटींत रावले जाल्यार पेडणेंची उदरगत निश्चीत जातली, अशें पेडणें मतदारसंघाचे आमदार प्रवीण आर्लेकार हांणी सांगलें.
देवूळवाडो कोरगांवां शिवजयंती कार्यावळींत आर्लेकार उलयताले. ह्या वेळार तांचे वांगडा माचयेर मांद्रें मतदारसंघाचे आमदार जीत आरोलकार, कोरगांवचे सरपंच समीर भाटलेकार, हरमल जिल्हो पंचायत वांगडी रंगनाथ कलशांवकार, तोर्से जिल्हो पंचायत वांगडी सीमा खडपे, नगराध्यक्ष माधव सिनाय देसाय, पंच देविदास नागवेंकार, पंच अब्दुल नायक, उपसरपंच कल्पिता कलशांवकार, पंच नीता नर्से, आदले जिल्हो पंचायत वांगडी दीपक कळंगूटकार, पार्सेचे सरपंच अजय कळंगूटकार, तुयेंची सरपंच लक्ष्मी नायक , आदले सरपंच सुदीप कोरगांवकार, उल्हास देसाय, पंच मालपेंकार, उद्देगज श्याम शेट्ये, आदले प्राचार्य सुदन बर्वे, राजन कोरगांवकार, समितीचे संजय कामुलकार, वसंत शिरोडकार, कृष्णा गावडे, संतोष पालयेंकार, उमेश तळावणेंकार, सुभाष केरकार, केशव शेट्ये हाजीर आशिल्ले.
आमदार आरोलकार हांणी सांगलें, स्वराज्याची स्थापना करतना छत्रपती शिवाजी महाराजान तळागाळांतल्या लोकांचे प्रस्न तांचे वांगडा रावून सोडयले. वेळ मेळटा तेन्ना गोरगरिबांच्या घरा वचून तांची वासपूस केली. तांकां जाय ते प्रमाण राज्य केलें. आयज तश्या राज्यकर्त्यांची गरज आसा. सगळ्यांनी एकवटींत रावून अशे तरेच्या कार्यावळींचें आयोजन हे मुखारूय बरे पद्दतीन करचें.
सुदन बर्वे हांणी प्रास्तावीक केलें. तांणी सागंलें, छत्रपती शिवाजी महाराज हांणी प्रजेचो विचार करतना सगळ्या धर्मांतल्या लोकांक वांगडा घेवन काम केलें. एक उच्च कोटीचो राजा म्हूण कितल्योश्योच पिळग्यो आयज लेगीत नांव घेतात. तांचो वावर आनी तांणी स्थापन केल्लें स्वराज्य आयज सगळ्यांनी तिगोवन दवरपाची गरज आसा. हया वेळार शिवजयंती सुवाळो समिती वतीन मानेस्तांचो भोवमान केलो. निवृत्त मुळावे शिक्षक भिवा गावडे हांचो शाल, नाल्ल आनी यादस्तीक चिन्न दिवन आमदार प्रवीण आर्लेकार आनी जीत आरोलकार हांचे हस्तुकीं सत्कार केलो. तशेंच बाल शिवाजीची वेशभुषा केल्लो युवराज विराज हरमलकार हाचोय यादस्तीक चिन्न दिवन भोवमान केलो. संजू कामुलकार हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
