भांगरभूंय | प्रतिनिधी
इंडीयन प्रिमीयर लिगेचे (आयपीएल) 59वे मॅचींत मुंबय इंडियन्सान सध्याचो वस्ताद चेन्नय सुपरकिंग्साक पांच विकेटींनी हारयलो. हे हारी उपरांत चेन्नय सुपरकिंग्साचें प्ले ऑफांत सुवात मेळोवपाचे सर्तींतल्यान भायर पडलो.
निमाण्यो उरिल्ल्यो दोन मॅची जिखल्यो तरी ताचे चडांतचड 12 गूण जातले. चार पंगडांनी पयलींच 14 वा ताचे परस चड गूण गूण मेळयल्यात.
मुंबय इंडियन्साचें आव्हान पयलींच सोंपला.
टॉस हारल्या उपरांत पयलीं बॅटींग करतना चेन्नय सुपरकिंग्साक 16 ओव्हरींनी फक्त 97 धांवड्यां मेरेन मजल मारप शक्य जालें. मुखेली महेंद्रसिंग धोनीन सगल्यांत चड नाबाद 36 धांवड्यो केल्यो. आयपीएलाच्या इतहासांतलो चेन्नय सुपरकिंग्साचो हो दुसरो उणो स्कोर आसा. हाचे आदीं 2013त मुंबय आड खेळटना फक्त 79 धांवड्यो केल्ल्यो.
मुंबय इंडियन्सान 98 धांवड्यांचो फाटलाव 14.5 ओव्हरींनी 5 विकेटी वगडावन केलो. एका वेळार मुंबय 33 धांवड्यांचेर 4 विकेटी वगडायिल्ल्यो. ते उपरांत तिलक वर्मा आनी ऋतिक शौकीन हाणें पांचवे विकेटी खातीर 48 धांवड्यांची भागिदारी करून मुंबयक परतून मॅचींत हाडलो. ऋतिकान 18 धांवड्यो केल्यो. तिलक 34 धांवड्यो करून नाबाद रावलो. टीम डॅव्हिडान 7 बॉलांनी नाबाद 16 धांवड्यो केल्यो.
ते पयलीं चेन्नय सुपरकिंग्साची सुरवात सामकी बाबत जाली. पयलेच ओव्हरींत डॅनिएल सॅम्स एलबीडब्ल्यू बाद जालो. ते उपरांत ओव्हरीच्या चवथ्या बॉलाचेर मोईन अली (0) लेगीत बाद जालो.
दुसरे ओव्हरीच्या चवथ्या बॉलाचेर जसप्रीत बुमरान रॉबिन उथप्पाक एलबीडब्ल्यू बाद केलो. सॅम्सान आपले तिसरे ओव्हरीच्या पयल्या बॉलाचेर ऋतुराज गायकवाडाक बाद केलो. ताची कॅच विकेटकीपर इशान किशनान धरली. सवे ओव्हरीच्या चवथ्या बॉलाचेर रायली मेरिडिथान अंबाती रायुडूक बाद केलो. ते उपरांत मेरिडिथान शिवम दुबेच्या रुपान आपली दुसरी विकेट घेतली. ड्वेन ब्राव्हो (12) कुमार कार्तिकेयाचो शिकार थारलो. कार्तिकेयान उपरांत सिमरजीताक लेगीत तंंबूंत धाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
