भांगरभूंय | प्रतिनिधी
भांगरभूंय । प्रतिनिधी
पणजीः चिन्मय घैसास हांच्या लेखनांत विशयाचें वैविध्य आनी समकालीन सामाजीक विशयांची कळकळ चड करून दिसता असें मत दैनीक नवप्रभाचो संपादक आनी लेखक परेश प्रभू हांणी उक्तायलें. घैसास हांच्या ‘कवडसे’ ह्या लेखन झेल्यांच्या प्रकाशन कार्यावळींत मुखेल सोयरे म्हणून ते उलयताले. पाटो-पणजी हांगच्या कला आनी संस्कृती खात्याचे भोवउद्देशीर सभाघरांत ह्या पुस्तकाचें प्रकाशन जालें.
कार्यावळीची येजमानकी कला आनी संस्कृती संचालक सगुण वेळीप हांणी चलयली. ह्या वेळार सम्राट क्लब इंटरनेशनलाचो गोंय राज्य अध्यक्ष आनी जीटीडीसीचो मार्केटींग उपम्हावेवस्थापक दीपक नार्वेकार तशेंच सम्राट क्लब- माशेलाचो अध्यक्ष सर्वेश फुलारी हाजीर आशिल्ले.
लेखक प्रा. चिन्मय घैसास हांणी सुरवके सगल्यांक येवकार दिवन प्रास्तावीक केलें. मानेस्ताचे हस्तुकीं पुस्तकाचें प्रकाशन जालें. सावित्रीबाई फुले पुणे विद्यापिठाच्या डॉ बाबासाहेब आंबेडकार अध्यासनाचे मुखेली तशेंच मराठी विभागाचो मुखेली डॉ मनोहर जाधव हांची ह्या पुस्तकांत प्रस्तावन आसा.
चिन्मय घैसास हांचें ‘रेशीमगाठी’ हें वेचीक कोंकणी ललित निबंधाच्या मराठी अणकाराचे पुस्तक हाचे पयलीं प्रकाशीत जालां. ते गोंय विद्यापिठाच्या मराठी विभागांत सहाय्यक प्राध्यापक म्हणून काम करतात. ते अणकारकार, स्तंभलेकक, निवेदन, गानय नट म्हणून प्रसिद्ध आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
