भांगरभूंय | प्रतिनिधी
भांगरभूंय । प्रतिनिधी
पणजीः दक्षीण गोंयांतल्या एके 17 वर्सां पिरायेचे चलयेचें अपहरण करून तिचेर बलात्कार करपी पुलीस खात्यांतलो आदलो कान्स्टेबल सिद्धार्थ ऊर्फ सिद्धू गोसावी हाका पणजेच्या फास्ट ट्रक न्यायालयान 10 वर्सांची सश्रम बंदखण आनी 1.15 लाख रुपयांच्या दंडाची ख्यास्त फर्मायल्या. विशेश न्यायालयाची (पॉक्सो) अध्यक्ष दुर्गा मडकयकारान हे संबंदीचो आदेश दिला.
वास्को पुलिसांनी बाल न्यायालयांत गोसावी हाचे आड आरोपपत्र सादर केल्लें. पिडेस्त चलयेन 16 जून 2018 दिसा कागाळ केल्ली. गोसावी हाणे 13 जून 2018 दिसा आपल्याक व्हरून उत्तर गोंयांतल्या आपल्या सोयऱ्यांच्या घरांत दवरले आनी 14 जूनाक घरा व्हरून सोडटां अशें सागून रानांत व्हरून लिंगीक अत्याचार केलो अशें कागाळेंत तिणे नमूद केल्लें. 17 जूनाक गोसावी हाका वास्को पुलिसांनी अटक केल्ली. पिडेस्त चलयेक ताब्यांत घेवन तिका मेरशेच्या अपना घरांत दवोरल्लें. 23 ऑगस्ट 2018 दिसा गोसावी हाका न्यायालयान सशर्त जामीन मंजूर केल्लो.
हें प्रकरण पॉक्सो कायद्या खाला येता ते खातीर तें फास्ट ट्रॅक न्यायालयांत वर्ग केल्लें. लोकांची राखण करप हे पुलिसाचें कर्तव्य आसतना गोसावी हाणे अपहरण आनी बलात्कारा सारको गंभीर गुन्यांव केल्ल्यान ताका कडक ख्यास्त दिवपाची मागणी सरकारी वकील ए. भोबे हांणी केल्ली. ताची दखल घेवन न्यायालयान ताका वेगवेगळ्या गुन्यांवा खातीर ख्यास्त फर्मायली. बलात्काराच्या गुन्यांवा खातीर ताका 10 वर्सांची सश्रम बंदखण दिली. सगळ्यो ख्यास्ती एकाच फावट भोगपाच्यो आसात. कोठडेत काडिल्ले दीस तातूंतल्यान वजा करपाक न्यायालयान सांगलां. दंडाची रक्कम भरल्यार ती पिडेस्त चलयेक दिवपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
